2030-cu ilədək 4SIM Azərbaycanda 650 müəssisənin rəqəmsal transformasiyasını dəstəkləyəcək

Azərbaycan İqtisadiyyat Nazirliyi yanında Dördüncü Sənaye İnqilabının Təhlili və Koordinasiya Mərkəzi (4SIM) 2030-cu ilədək ölkədə 650 müəssisənin rəqəmsal transformasiyasını həyata keçirməyi planlaşdırır. Bu proses cari ildə başlayacaq.

Operativ Media  xəbər verir ki, bunu İqtisadiyyat Nazirliyi yanında Dördüncü Sənaye İnqilabının Təhlili və Koordinasiya Mərkəzinin (4SIM) icraçı direktoru Fariz Cəfərov 2024-cü ilin yekunlarına həsr olunmuş konfransda çıxışı zamanı deyib.

O qeyd edib ki, bu ildən başlayaraq 4SIM 2030-cu ilə qədər davam edəcək “Sənaye 4.0” təlim proqramı çərçivəsində rəqəmsal transformasiyaya başlayacaq. “Proqramın bir hissəsi olaraq, 4SIM həm yerli, həm də xarici mütəxəssisləri cəlb edəcək, onlar müəssisələrə baş çəkəcək, biznes proseslərini öyrənəcək, sonra isə yol xəritəsini tərtib edəcək, əməliyyatların təkmilləşdirilməsi üçün hansı texnologiyaların tətbiqinin lazım olduğunu müəyyənləşdirəcək. Sonradan bu texnologiya və innovasiyaları tətbiq edən fabrik və zavodlar öz istehsalını təkmilləşdirəcək və daha yaxşı nəticələr əldə edəcəklər”, - deyə F.Cəfərov bildirib.

Onun sözlərinə görə, müəssisələr həm dövlət, həm də özəl sektoru təmsil edəcək.

F.Cəfərov onu da qeyd edib ki, ötən il tədris proqramı çərçivəsində bir neçə müəssisədə rəqəmsal diaqnostika aparılıb. Müəssisələrin rəqəmsal transformasiyaya hazırlıq səviyyəsi ölçülüb və müvafiq yol xəritələri hazırlanıb. 4SIM-in 2025-ci ildə daha 15, 2030-cu ilə qədər isə 650 müəssisənin rəqəmsal transformasiyasına dəstək verməsi planlaşdırılır.