"Yuventus" yeni baş məşqçisini açıqladı

"Yuventus" Futbol Klubu baş məşqçi Tiago Mottanı vəzifəsindən azad edərək, xorvatiyalı mütəxəssis İqor Tudoru yeni baş məşqçi təyin edib.

Operativ Media xəbər verir ki, bu haqda klubun mətbuat xidməti məlumat yayıb.

Bu qərar, komandanın ardıcıl iki ağır məğlubiyyət də daxil olmaqla, uğursuz çıxışlarından sonra qəbul edilib. Hazırda "Yuventus" A Seriyasında beşinci yerdə qərarlaşıb. 

Klubun rəsmi bəyanatında qeyd olunur ki, İqor Tudor sabah komanda ilə ilk məşqinə çıxacaq. 

Qeyd edək ki, İqor Tudor 1998-2007-ci illərdə "Yuventus"un heyətində müdafiəçi kimi çıxış edib və bu müddət ərzində iki dəfə A Seriyası çempionluğunu qazanıb. O, həmçinin 2020-ci ildə Andrea Pirlonun baş məşqçiliyi dövründə onun köməkçisi kimi "Yuventus"da çalışıb. 

Tudorun son məşqçilik fəaliyyəti 2024-cü ildə "Latsio" klubunda olub. Onun "Yuventus"a baş məşqçi təyin edilməsi, klubun mövsümün qalan hissəsində uğurlu nəticələr əldə etməsi üçün yeni bir başlanğıc kimi qiymətləndirilir.