Luka Skiepatti: TAP Konsorsiumu bərpa olunan qazların nəqli üçün yol xəritəsi hazırlayıb

Trans-Adriatik Qaz Boru Kəməri Konsorsiumu (TAP AG) təbii qazın hidrogenlə qarışığının, eləcə də digər bərpa olunan qazların orta və uzunmüddətli dövrdə nəqli üçün yol xəritəsi hazırlayıb.

Operativ Media xəbər verir ki, bu barədə TAP AG-nin idarəedici direktoru Luka Skiepatti Bakıda keçirilən Cənub Qaz Dəhlizi Məşvərət Şurasının 11-ci və Yaşıl Enerji Məşvərət Şurasının 3-cü iclaslarında çıxışı zamanı bildirib.

"Hazırda Trans-Adriatik Boru Kəmərində istifadə olunan materiallar beynəlxalq laboratoriyalarda sınaqdan keçirilir. Eyni zamanda, TAP infrastrukturunun hidrogenin nəqli üçün texniki uyğunluğu təhlil olunur. Bu proses “uyğunsuzluqların təhlili” (gap analysis) çərçivəsində aparılır və nəticələr gələcək planlaşdırmada nəzərə alınacaq.", - deyə o bildirib.

O əlavə edib ki, TAP konsorsiumu biometanın istifadəsi imkanlarına da xüsusi diqqət yetirir:

“Xüsusilə, Yunanıstandan başlayaraq Avropa İttifaqı səviyyəsində normativ bazanın inkişafına dəstək göstərilir. Bu çərçivədə milli reyestrin, mənşə sertifikatları sisteminin yaradılması və biometanın dayanıqlılığının təsdiqlənməsi nəzərdə tutulur”.

L.Skiepatti bildirib ki, belə bir sistem biometanın Avropada virtual olaraq alınmasına və daha sonra TAP kompressor stansiyasına revers rejimində tədarük edilməsinə imkan yaradacaq:

“Orada biometan turbinlər üçün bərpa olunan yanacaq kimi istifadə oluna bilər. Bu isə təbii qazın istifadəsindən yaranan istixana qazı emissiyalarını tamamilə aradan qaldırmağa şərait yaradacaq”.