Vüqar Oruc: Bakı–Tbilisi–Qars dəmiryolu həm ticarət, həm də iqtisadi inkişaf baxımından böyük əhəmiyyət kəsb edir

"Bakı–Tbilisi–Qars dəmiryolu köhnə Böyük İpək Yolunun indiki formasını təmsil edir. Bu Asiya ilə Avropanı birləşdirən strateji bir nəqliyyat xəttidir və həm ticarət, həm də iqtisadi inkişaf baxımından böyük əhəmiyyət kəsb edir. Dəmir yolunun əhəmiyyəti bu yolu istifadə edən dövlətlərin iqtisadi inkişafına ciddi təsir göstərməsi və əlavə gəlirlər təmin etməsi ilə bağlıdır. Beləliklə həm ticarət dövriyyəsinin artması, həm də müxtəlif məhsulların əlçatanlığının təmin olunması mümkün olacaq".

"Operativ Media xəbər verir ki, bunu Azərbaycan Qiymətləndiricilər Cəmiyyətinin sədri Vüqar Oruc bildirib.

Onun sözlərinə görə, Bakı–Tbilisi–Qars dəmiryolunun əhəmiyyətini vurğulamaq lazımdır. Bu xəttin mərkəzində Azərbaycan, Gürcüstan və Türkiyə dayanır. Vüqar Oruc qeyd edir ki, bu böyük missiyanın başında Azərbaycan dayanır: “Azərbaycanın bu prosesdə öndə olması və əsas təşəbbüskar kimi çıxış etməsi onu göstərir ki, Azərbaycan, qlobal miqyasda çox qütbləşən dünya siyasətində vacib bir rol oynayır.”

O, həmçinin, dünya siyasətindəki dəyişiklikləri izah edərək bildirir ki, bəzi ölkələr qlobal hegemonluq məqsədi güdürlər. Lakin Azərbaycan və onun tərəfdaşları olan Türkiyə və Gürcüstan bu yeni iqtisadi dinamikada öz alternativ güclərini dünyaya təqdim etmək üçün önəmli bir rol oynayırlar. Bu gün Çin iqtisadi baxımdan inkişaf edir və Avropa, Asiya və Amerika kimi qitələrdə mühüm iqtisadi tərəfdaşdır. Türk Dövlətləri Birliyi və Türk Dövlətləri Təşkilatı da öz növbəsində bu qütbləşmədə mühüm bir mövqe tutmaqdadır.

Vüqar Orucun sözlərinə görə, son dövrlərdə Amerika Birləşmiş Ştatlarının yeni prezidenti Donald Trampın tətbiq etdiyi idxal rüsumları müəyyən qədər dəyişiklik yaratsa da, qlobal iqtisadiyyatın yeni formalaşan tendensiyalarını dayandıra bilməyəcək: “Atılan addımlar yalnız Amerikanın tərəfdaşlarına və ya rəqiblərinə təsir göstərəcək. Bakı-Tbilisi-Qars dəmiryolu isə yeni iqtisadi və siyasi qütblərin mövqelərini möhkəmləndirir və təkqütblülükdən imtina etməyə kömək edir.”

Vüqar Oruc bu prosesin Azərbaycan üçün böyük əhəmiyyət kəsb etdiyini və onun iqtisadi və siyasi baxımdan böyük nəticələrə gətirib çıxaracağını vurğulayıb.

Xeyrənsə Ramilqızı