"Mövsüm bitdikdən sonra transfer haqda düşünəcəyəm".

Bunu Operativ Media-ya açıqlamasında Albaniyanın “Eqnatia” klubunun azərbaycanlı müdafiəçisi Zamiq Əliyev deyib.

Təcrübəli futbolçu Albaniya kubokunun finalına vəsiqə qazandıqlarına görə çox sevincli olduğunu bildirib:

“Finala çıxdığımız üçün çox xoşbəxtəm. Bütün çətinliklərə baxmayaraq, geri dönüş edə bildik və oyunu layiqincə qazandıq. İndiki əsas hədəfimiz həm kuboku, həm də çempionluğu qazanmaqdır. Yəni iki kuboku da qazanmağa çalışacağıq.”

Azərbaycan kuboku haqda da danışan  milli futbolçu hər iki komandaya uğurlar arzu edib 

“Hər iki komandaya təbriklərimi çatdırıram. Finalda uğurlar arzulayıram. İnanıram ki, gözəl bir qarşılaşma olacaq. Qəlbim 'Qarabağ'ın qalib gəlməsini istəyir, amma haqq edən qazansın, inşallah.”

Transfer məsələlərinə də toxunan müdafiəçi hazırda bu barədə düşünmədiyini vurğulayıb:

“Hələlik bu barədə heç nə düşünmürəm. Menecerim transferlə bağlı işlərin yaxşı getdiyini deyir. Ancaq mən bütün fikrimi 'Eqnatia'ya yönəltmişəm. Qarşıda çox vacib oyunlar var. Hədəfimiz iki titulu da qazanmaqdır. Yalnız bundan sonra bu mövzu haqqında düşünəcəyəm.”