"Karvan"ın hücumçusu: "Mövsüm boyu çəkdiyimiz əziyyətin bəhrəsini gördük"

"Əldən verdiyimiz ikinci yerə yenidən yüksəlmək istəyirik".

Bunu Operativ Media-ya açıqlamasında "Karvan" futbol klubunun hücumçusu Emil Qasımov deyib.

O, mövsüm ərzində göstərilən səylərin nəticə verdiyini bildirib.

“Mövsüm boyu çəkdiyimiz əziyyətin bəhrəsini gördük. Çox çalışdıq, çox istədik. Bütün 'Karvan' azarkeşlərinə təşəkkürümü bildirirəm. Düzdür, mövsüm bitməyib, amma geridə qalan oyunlarda bizə olan dəstəkləri və inamları heç vaxt dayanmadı. Həmişə onların dəstəklərinə inanaraq, istər səfər, istərsə də ev oyunlarına çıxdıq", – deyə futbolçu bildirib.

Qasımov qarşıda baş tutacaq oyunlara da ciddi hazırlaşdıqlarını vurğulayıb: “Qarşıda oyunlarımız var. Bu oyunlara da maksimum köklənib qələbə qazanmaq istəyirik. Çünki əldən verdiyimiz ikinci yerə yenidən yüksəlmək istəyirik. Bu yolda əziyyəti olan hər kəsə – azarkeşlərə, futbolçu yoldaşlarıma, məşqçilərimizə təşəkkür edirəm”.

Təcrübəli hücumçu "Karvan"ın Premyer Liqaya yüksəlməsini xüsusi qeyd edib: “'Karvan' 16 ildən sonra Premyer Liqaya yüksəldi. 'Karvan' aşağı liqalara yaraşmayan bir klubdur. Yüksək yerlər uğrunda oynayan bir klubdur. Biz də bundan sonra bacardığımız qədər 'Karvan'ı ən yaxşı yerlərə gətirib çıxartmağa çalışacağıq”.