Özbəkistan və Azərbaycan arasındakı ticarət əlaqələri sürətlə inkişaf edir. 2024-cü ildə iki ölkə arasındakı illik ticarət dövriyyəsi 252,05 milyon ABŞ dolları səviyyəsində olub. Bu il isə ticarət dövriyyəsi 25% artıb.
Operativ Media xəbər verir ki, tərəflər illik ticarət dövriyyəsinin həcmini 1 milyard dollara çatdırmağı hədəfləyir.
Özbəkistan və Azərbaycan arasında həyata keçirilən birgə layihələrin ümumi dəyəri 4 milyard dolları aşır. Bu layihələr infrastruktur, sənaye, kənd təsərrüfatı, səhiyyə və digər sahələrdə geniş əməkdaşlıq imkanları yaratmaqda davam edir. Həmçinin, iki ölkə arasında təxminən 300 birgə müəssisə fəaliyyət göstərir.
Sərmayə qoyuluşu sahəsində də əhəmiyyətli artım müşahidə olunur. Özbəkistan və Azərbaycan arasında yeni investisiya layihələrinin həyata keçirilməsi və birgə investisiya şirkətlərinin fəaliyyətinin genişləndirilməsi planlaşdırılır.
Nəqliyyat və kommunikasiya sahəsindəki əməkdaşlıq da sürətlə inkişaf edir. Özbəkistan yüklərinin Azərbaycan üzərindən daşınması 25% artmışdır ki, bu da ticarət dövriyyəsinin daha da yüksəlməsinə şərait yaradır.
Bu inkişaflar iki ölkə arasında strateji tərəfdaşlıq və qarşılıqlı faydalı əlaqələrin daha da güclənəcəyini göstərir.
