Türkiyə Futbol Federasiyasının prezidenti İsraillə bağlı UEFA-ya məktub göndərib

Türkiyə Futbol Federasiyasının (TFF) prezidenti İbrahim Hacıosmanoğlu FİFA və UEFA-ya məktub göndərərək İsrail klublarının və İsrail millisinin yarışlardan dərhal kənarlaşdırılmasını tələb edib.

Operativ Media bu barədə "NTV Spor"a istinadən xəbər verir.

Hacıosmanoğlunun sözlərinə görə, idman dünyası və futbol qurumları İsrailin atdığı addımlara çox uzun müddətdir ki, susub.

Məktubda deyilir: "İllərdir humanitar təşkilatlar İsrailin hərəkətləri nəticəsində yaranan ölüm və iztirablarla bağlı narahatlıqlarını bildirirlər. Hər gün daha çox günahsız insan ölür. İndi FİFA və UEFA-nın hərəkətə keçmə vaxtıdır. İsrail dərhal bütün idman yarışlarından kənarlaşdırılmalıdır".

Sentyabrın 23-də UEFA İcraiyyə Komitəsinin iclası keçirilib və məlumata görə, təşkilat ABŞ-nin təzyiqlərinə baxmayaraq, İsrail klublarını və milli komandasını dayandırmamaq qərarına gəlib.

Cümə axşamı "The Times" qəzeti yazıb ki, UEFA-nın icraiyyə komitəsi üzvlərinin əksəriyyəti İsrail komandalarının beynəlxalq yarışlarda iştirakının qadağan edilməsinin tərəfdarıdır. Belə bir qərar gələn həftə verilə bilər.