"Bavariya" PSJ ilə oyun öncəsi Paris polisinin hərəkətlərinə görə UEFA-ya etiraz edib

"Bavariya" Çempionlar Liqası çərçivəsində PSJ ilə oyun öncəsi Paris polisinin verdiyi göstərişə görə UEFA-ya etiraz edib.

Operativ Media xəbər verir ki, bu haqda klubun mətbuat xidməti məlumat yayıb.

Məlumata görə, ümumi qayda bütün azarkeş avtobuslarına şamil edilir və bildirilir ki, onlar matçdan əvvəl şəhər kənarındakı ödənişli dayanacaqda toplaşmalıdırlar. Bundan əlavə, digər şərtlərlə yanaşı, bütün “Bavariya” azarkeşlərinin stadiona yalnız ictimai nəqliyyatla getmələri tələb olunur. Matçdan sonra hər kəs öz avtomobilinə qayıtmalıdır. Daha sonra avtobuslar şəhər polisi tərəfindən müşayiət olunacaq.

"Bavariya" rəhbərliyi bu qərarın qısa müddətdə qəbul edilməsini qəbuledilməz hesab edib və Münhen klubunun azarkeşləri üçün təhlükə riskində heç bir dəyişiklik olmadığını bildirib. Klub, həmçinin PSJ-nin də UEFA-ya edilən müraciəti dəstəklədiyini açıqlayıb.

Qeyd edək ki, 2023-cü ildə Çempionlar Liqasının 1/8 final mərhələsində komandalar arasında keçirilən oyun zamanı Paris klubunun azarkeşləri “Bavariya” azarkeşinə hücum etmişdilər.

Komandalar arasında qarşılaşma noyabrın 4-də Parisdə keçiriləcək. Oyun Bakı vaxtı ilə saat 23:00-da başlayacaq.