"Araz-Naxçıvan"ın baş məşqçisi: "Son 5-6 oyunda komandamı tanıya bilmirəm"

Meydanda görmək istədiyim komanda yoxdur.

Operativ Media xəbər verir ki, bunu Azərbaycan kubokunun 1/8 final mərhələsində "Kəpəz"lə keçirilən oyundan sonra mətbuat konfransında baş məşqçi Elmar Baxşıyev deyib.

O, komandasının zəif çıxış etdiyini qeyd edib.

"Oyuna komanda olaraq pis qoşulduq. Kubok və çempionat fərqli yarışdır. Burada gərək əlindən gələnin yüz faizini edəsən ki, məqsədinə çatasan. Açığı, son 5-6 oyunda komandamı tanıya bilmirəm. Meydanda görmək istədiyim komanda yoxdur. Təbii ki, problem özümüzdədir. Bu durumdan çıxmaq üçün daha artığını etməliyik.

Hər bir məğlubiyyət təzyiq yaradır. Önəmli olan məğlubiyyət yox, komandanın meydanda göstərdiyi oyundur. Çox zəif çıxış etdik. Səbəbini araşdırmalı, daha yaxşı etmək məcburiyyətindəyik".