2025-ci ildə İpoteka və Kredit Zəmanət Fondunun müvəkkil bankları tərəfindən ümumilikdə 442,8 milyon manat məbləğində 4 309 ipoteka krediti verilib. Bunlardan 347,2 milyon manat 3 153 adi ipoteka krediti, 95,6 milyon manat isə 1 156 güzəştli ipoteka krediti təşkil edib.

Operativ Media-nın Fonda istinadən verdiyi xəbərə görə, Fondun vəsaiti hesabına verilən ipoteka kreditlərinin ümumi həcmi 3,76 milyard manatı ötüb. Bu kreditlər 56 800-dən çox ailənin mənzil şəraitinin yaxşılaşmasına imkan yaradıb.

Şəxsi yığımları kifayət qədər olmayan vətəndaşların daha aşağı ilkin ödənişlə ipoteka kreditlərindən faydalanmasını təmin etmək məqsədilə Fond 1 yanvar 2026-cı il tarixinədək 139,9 milyon manat məbləğində 1 490 ipoteka krediti üzrə zəmanət verib.

Məlumata görə, Fondun vəsaiti hesabına verilən ipoteka kreditlərindən faydalananların 67 faizi gənclər və gənc ailələr, təxminən 22 faizi isə regionların payına düşüb.