İngiltərədə futbol inqilabı: VAR-ın taleyi məşqçilərin əlinə keçir

İngiltərə Futbol Assosiasiyası (FA) Videotəkrar (VAR) sistemindən istifadə protokolunda dəyişiklik etmək niyyətindədir.

Operativ Media "The Daily Telegraph" nəşrinə istinadən xəbər verir ki, Britaniya futbolunun rəhbər orqanı baş məşqçilərə VAR sisteminə müraciət etmək hüququnun verilməsi imkanlarını nəzərdən keçirir.

Təşəbbüs oyun zamanı yubanmaların sayını azaltmaq məqsədilə hakimlərin subyektiv qərarlarının yenidən nəzərdən keçirilməsi üçün "məşqçi çellenji" (etiraz sorğusu) sisteminin tətbiqini nəzərdə tutur. Planlaşdırılır ki, hər komandanın baş məşqçisinə oyun ərzində iki uğursuz videotəkrar sorğusu hüququ verilsin. Əgər məşqçinin etirazı hakimlər tərəfindən haqlı sayılarsa, həmin sorğu hüququ saxlanılacaq.

Buna bənzər sistem artıq idmanın digər növlərində — xüsusilə Amerika futbolu (NFL) və reqbi liqasında tətbiq olunur. Gözlənilir ki, faktiki vəziyyətlər (ofsaydlar, topun meydandan çıxması) əvvəlki kimi avtomatik yoxlanılacaq. Lakin subyektiv məqamlar (fol, əllə oyun, mübahisəli kontaktlar) yalnız məşqçinin sorğusu əsasında yenidən nəzərdən keçirilə bilər.

Sorğu hüququndan istifadə etmək üçün məşqçilər ehtiyat hakimə xüsusi siqnal verməli olacaqlar.

FA-nın baş katibi Mark Bullingem bu yanaşmanın öyrənilməsində maraqlı olduqlarını təsdiqləyib. "The Times" nəşri Bullingemdən belə bir sitat gətirib: "Bu, dinamikanı dəyişir, VAR-ın müdaxilələrinin sayını azaldır və faktiki olaraq məsuliyyəti məşqçinin üzərinə qoyur".