"Sheki City" xərəkdaşıyanlara görə 200 manat cərimələndi

AFFA İntizam Komitəsi II Liqanın XVI turunda keçirilmiş oyunlarda qeydə alınan qayda pozuntuları ilə bağlı qərarlarını açıqlayıb.

Operativ Media xəbər verir ki, qərarlara əsasən, “Xankəndi” – “Araz Saatlı” oyununda 5 futbolçusu sarı vərəqə aldığı üçün “Araz Saatlı” 70 manat, “Ağstafa Gəncləri” – “Göygöl” matçında təşkilati-texniki öhdəlikləri pozduğuna görə “Ağstafa Gəncləri” 100 manat cərimə edilib. Həmin oyunda “Göygöl”ün futbolçusu Ruslan Süleymanov ikinci sarı vərəqədən qırmızı vərəqə alaraq meydandan qovulduğu üçün 1 oyunluq cəza alıb və klubu 50 manat cərimələnib.

Eyni zamanda, “Sheki City” – “Ağdaş” qarşılaşmasında xərəkdaşıyan heyətin olmaması səbəbindən “Sheki City” 200 manat cərimə ilə üzləşib.

“Dinamo” – “Şirvan” matçında isə hər iki komanda intizam qaydalarını pozub. Belə ki, hər iki klubun 4 futbolçusu sarı vərəqə aldığı üçün həm “Dinamo”, həm də “Şirvan” komandalarının hər biri 70 manat məbləğində cərimə edilib.