12U TDT-Sat kub peyk layihəsi istehsalı buraxılışa hazırlanır
30 mart 2026-cı il tarixində Daşkənd şəhərində keçirilmiş Türk Dövlətləri Təşkilatının (TDT) Kosmik Agentliklər Rəhbərlərinin 5-ci iclası çərçivəsində, 12U TDT-Sat kub peyk layihəsi üzrə əldə olunmuş irəliləyişlər müzakirə edilmiş, sözügedən layihənin iştirakçı ölkələrin ortaq baxışını, texniki potensialını və əməkdaşlıq ruhunu əks etdirən flaqman təşəbbüs olduğu vurğulanmışdır.
Operativ Media TDT-yə istinadən xəbər verir ki, toplantı zamanı, kosmik agentliklərin rəhbərləri peykin istehsal prosesindəki son yenilikləri dəyərləndirmiş və qarşıdan gələn buraxılış prosesi ilə bağlı fikir mübadiləsi aparmışlar.
TDT-Sat missiyası, yer müşahidəsi, orbitdə texnologiyaların sınaqdan keçirilməsi və ortaq kosmik imkanların inkişafını hədəfləyən, başdan sona qədər layihələndirilmiş kompakt nanosat peyk layihəsidir.
