Tramp Si Cinpini ABŞ-də hərbi bazada qarşılayıb

ABŞ Prezidenti Donald Tramp Çinin Sədri Si Cinpini Vaşinqton yaxınlığındakı Endryus hərbi bazasında qarşılayıb.

Operativ Media xəbər verir ki, Si Cinpinin təyyarəsi sentyabrın 23-də saat 17:39-da (24 sentyabr, Moskva vaxtı ilə 00:39) hərbi bazaya enib. Çin liderinin qarşılanması üçün uçuş-enmə zolağında qırmızı xalça sərilib və ABŞ hərbçiləri təntənəli formada düzülüb.

Tramp və Si Cinpin əl sıxaraq bir neçə dəqiqə söhbət ediblər. Daha sonra hərbi orkestr Çin və ABŞ-nin dövlət himnlərini ifa edib, artilleriya yaylım atəşi açılıb.

Baza üzərindən ABŞ hərbi təyyarələri, o cümlədən B-1 bombardmançıları uçuş həyata keçirib. Ağ Evin mətbuat qrupunun məlumatına görə, uçuş-enmə zolağında altı F-16 və altı F-22 qırıcısı da yerləşdirilib.

Tramp və ABŞ-nin birinci xanımı Melaniya Tramp Si Cinpini və həyat yoldaşı Pen Liyuanı avtomobilə qədər müşayiət etdikdən sonra helikopterlə hərbi bazanı tərk ediblər.

Çin Xarici İşlər Nazirliyinin məlumatına görə, Si Cinpinin ABŞ-yə dövlət səfəri sentyabrın 23-dən 25-dək davam edəcək. Donald Tramp isə mayın 13-15-də Çinə səfər edib.

“Financial Times” daha əvvəl bildirmişdi ki, Trampın Si Cinpini Endryus hərbi bazasında qarşılaması 60 ildən çox müddətdə protokoldan ilk belə kənara çıxma halıdır. Nəşrin məlumatına görə, sonuncu dəfə ABŞ Silahlı Qüvvələrinin Ali Baş Komandanı 1962-ci ildə bu bazada xarici lideri qarşılayıb. Həmin vaxt Prezident Con Kennedi Böyük Britaniyanın Baş naziri Harold Makmillanı uçuş-enmə zolağında qarşılayıb.

2025-ci ilin avqustunda isə Tramp Alyaskada keçirilən ABŞ-Rusiya sammiti çərçivəsində Rusiyanın Prezidenti Vladimir Putini Ankoricdə uçuş-enmə zolağında qarşılamışdı.