Azərbaycan Beynəlxalq İnvestisiya Forumunda 11 sənəd imzalanıb - YENİLƏNİB

İkinci Azərbaycan Beynəlxalq İnvestisiya Forumunun ilk günündə müxtəlif sahələri əhatə edən 11 sənəd imzalanıb.

Operativ Media xəbər verir ki, sənədlər tikinti və inkişaf, rəqəmsal iqtisadiyyat, bərpa olunan enerji, sənaye, kənd təsərrüfatı, baytarlıq, əczaçılıq, maliyyə, su ehtiyatlarının idarə olunması və investisiyaların təşviqi sahələrini əhatə edir.

Tikinti və inkişaf sahəsində əməkdaşlıq sənədi iqtisadiyyat nazirinin müavini Anar Axundov və “ROX Group” Səhmdar Cəmiyyətinin baş icraçı direktorunun müavini Ta Ngoc Da tərəfindən imzalanıb.

Azərbaycanın rəqəmsal iqtisadiyyatının inkişafı üzrə əməkdaşlıq sənədinə iqtisadiyyat nazirinin müavini Azər Bayramov və “Microsoft Romania, Moldova & CIS” şirkətinin baş meneceri Qabriela Popesku imza atıblar.

Azərbaycanda günəş və külək enerjisi layihələri üzrə əməkdaşlıq sənədi energetika nazirinin müavini Elnur Soltanov və “Energy Companies – ROX Group”un İcraiyyə Şurasının sədri Pham Minh Tuan tərəfindən imzalanıb.

Yeni texnologiyalar əsasında silisium karbid, silisium oksid və silisium istehsalı ilə bağlı sənədi Ələt Azad İqtisadi Zonasının Səlahiyyətli Qurumunun İdarə Heyətinin sədri Valeh Ələsgərov və “Inoyest AFEZCO”nun təsisçisi Vitali Yevdokimenko imzalayıb.

ABAK-WASSERSTEIN İsveçrə-Azərbaycan plantasiya və emal müəssisələri layihələri üzrə sənədə Ağstafa Rayon İcra Hakimiyyətinin başçısı Seymur Orucov və “iCsquared GmbH” şirkətinin nümayəndəsi Zoltan Peter Ştuxlik imza atıblar.

Ağdam quşçuluq layihəsi üzrə sənəd Azərbaycan Biznesinin İnkişafı Fondunun İdarə Heyətinin sədri Ülvi Mansurov, “AgroDairy” MMC-nin baş icraçı direktoru Niyazi Əmirbəyov və “AGROFERT, a.s.” şirkətinin İdarə Heyəti sədrinin müavini Petr Çinqr tərəfindən imzalanıb.

Baytarlıq peyvəndlərinin istehsalı layihəsi üzrə sənədə Ülvi Mansurov və “VETAL HAYVAN SAĞLIĞI ÜRÜNLERİ A.Ş.” şirkətinin direktoru Abdullah Tutak imza atıblar.

Əczaçılıq istehsalı müəssisəsinin yaradılması ilə bağlı sənəd isə Ülvi Mansurov və “Saneca Pharmaceuticals, a.s.” şirkətinin baş maliyyə direktoru Ondrej Draqun tərəfindən imzalanıb.

Azərbaycan-Oman Birbaşa İnvestisiya Fondu tərəfindən “Azər-Türk Bank” ASC-də nəzarət etməyən payın əldə edilməsi ilə bağlı sənədə baş icraçı direktorun vəzifəsini icra edən Dəyanət Sədullayev və Oman İnvestisiya Qurumunun “G2G Funds” üzrə böyük meneceri Saif Almahrouqi imza atıblar.

“Esyasoft”, Azərbaycan Dövlət Su Ehtiyatları Agentliyi və SOCAR arasında əməkdaşlıq sənədi SOCAR prezidenti Rövşən Nəcəf, “Esyasoft”un nümayəndəsi Bibin Çandra və ADSEA sədri Zaur Mikayılov tərəfindən imzalanıb.

İnvestisiyaların təşviqi sahəsində Azərbaycan və Ukrayna arasında əməkdaşlığa dair sənədi isə AZPROMO-nun icraçı direktoru Yusif Abdullayev və “UkraineInvest”in icraçı direktoru Maryna Xlistun imzalayıb.

12:31

İkinci Azərbaycan Beynəlxalq İnvestisiya Forumunun ilk günündə müxtəlif sahələri əhatə edən 11 sənəd imzalanıb.

Operativ Media xəbər verir ki, imzalanan sənədlər tikinti və inkişaf, bərpa olunan enerji, sənaye, kənd təsərrüfatı, baytarlıq, əczaçılıq, maliyyə, su ehtiyatlarının idarə olunması, idman, investisiyaların təşviqi və rəqəmsal texnologiyalar sahələrində əməkdaşlığı nəzərdə tutur.

Sənədlər arasında “ROX Group” ilə tikinti və inkişaf sahəsində əməkdaşlıq, Azərbaycanda günəş və külək enerjisi layihələrinin həyata keçirilməsi, həmçinin yeni texnologiya əsasında silisium karbidi, silisium oksidi və silisium istehsalı ilə bağlı razılaşmalar yer alıb.

Bundan başqa, Ağstafada plantasiya və emal müəssisələrinin yaradılması, Ağdamda quşçuluq layihəsinin həyata keçirilməsi, baytarlıq vaksinlərinin istehsalı və əczaçılıq müəssisəsinin yaradılması ilə bağlı sənədlər imzalanıb.

Həmçinin Azərbaycan-Oman Birbaşa İnvestisiya Fondu tərəfindən “AzərTürk Bank” ASC-də nəzarət hüququ verməyən payın əldə edilməsi, “Esyasoft”, SOCAR və Azərbaycan Dövlət Su Ehtiyatları Agentliyi arasında əməkdaşlıq, eləcə də SOCAR ilə İtaliya Futbol Federasiyası arasında strateji tərəfdaşlıqla bağlı sənədlər rəsmiləşdirilib.

Forum çərçivəsində Azərbaycan və Ukrayna arasında investisiyaların təşviqi sahəsində əməkdaşlığa dair sənəd, həmçinin İqtisadiyyat Nazirliyi ilə “Microsoft Ireland Operations Limited” arasında Anlaşma Memorandumu da imzalanıb.