Fransa polisi etirazçılara zorakılıq edib
Fransada 2023-cü ilin yanvarından bəri pensiya islahatına qarşı keçirilən ümummilli etiraz nümayişinin 14-cü raundu baş tutub.
"Operativ Media" xəbər verir ki, "Ümumi Əmək Konfederasiyası"nın məlumatına görə, etiraz aksiyalarında ümumilikdə 900 minə yaxın insan iştirak edib. Parisdə nümayişin əvvəlində polis və nümayişçilər arasında gərginlik yaşanıb. Makronun 2017-ci ildə ilk dəfə prezident seçildikdən sonra qələbəsini qeyd etdiyi “La Rotonde” restoranı yaxınlığında nümayişçilərlə polis arasında qarşıdurma olub. Restoranın prezidentə aid olduğunu düşünən etirazçılar restoranın vitrinini sındırmağa cəhd ediblər. Polis restoranın ətrafını mühasirəyə alaraq qoruyub. Nümayişçiləri dağıtmaq üçün su şırnağından istifadə edilib. Paris-2024 Olimpiya Oyunları təşkilat komitəsinin binasına da nümayişçilər daxil ola bilib. Onlar etiraz aksiyalarının dayandırmayacaqlarını bəyan ediblər. Etiraz aksiyası zamanı 28 nəfər polislər tərəfindən saxlanılıb. Saxlanılanların əksəriyyəti aksiyaya qadağan olunmuş əşyalar gətirməyə cəhddə ittiham olunub.
