"Milan" fransalı hücumçunu istəyir

Zlatan İbrahimoviç futbolu buraxdıqdan sonra "Milan" hücumçu axtarışlarına başlayıb və gözlərini Markus Tyurama dikib.

İqtisadiyyat.az xəbər verir ki, Seriya A-da çempionluq hədəfinə çata bilməyən "Milan" idman direktoru Paolo Maldini ilə yollarını ayırarkən, bir yandan da transfer çalışmalarını sürətləndirib. "Qırmızı-qaralar"ın Almaniyanın "Borussiya Mönhenqladbax" komandasında çıxış edən fransalı hücumçu Markus Tyuramla maraqlandığı iddia edilib.

Müqaviləsinin müddəti başa çatacaq Tyuram, Zlatan İbrahimoviçin futbolu tərk etməsindən sonra hücumçu rotasiyasında qalan boşluğu dolduracağı düşünülür.

Digər hücumçu Olivye Jiru sentyabrda 37 yaşını tamamlayacağı üçün bu mövqeyi gücləndirməyi hədəfləyən "Milan" bu mövsüm Bundesliqada 13 qol və 6 məhsuldar ötürmə edən 25 yaşlı oyunçunu pulsuz olaraq heyətinə qatmaq istəyir.

Seriya A-da “Parma” və “Yuventus” formaları ilə əfsanəvi olan unudulmaz müdafiəçi Lilian Tyuramın oğlu Markusu baş məşqçi Stefano Pioli də bəyənir.

Fransa milli komandasında da çıxış edən Markus, müqaviləsi bu yay başa çatacaq oyunçular arasında ən dəyərlilərdən biri kimi göstərilir.

"Soşo" akademiyasında yetişən ulduz futbolçu ölkəsində son dəfə "Guingamp" komandasının formasını geyinib və 2018-2019-cu illərdə vurduğu 9 qoldan sonra Bundesliqaya keçərək ilk mövsümündə 10 qol vurmağı bacarıb.