Ukrayna ordusu şərq cəbhəsində irəliləyir

Rusiyanın Ukraynanın Xerson vilayətini atəşə tutması nəticəsində 1 nəfər ölüb, 18 nəfər yaralanıb.

"Operativ Media" xəbər verir ki, bu barədə Xerson Vilayət Hərbi Administrasiyası məlumat yayıb. Bildirilib ki, Kaxovka SES-in partlatması nəticəsində su altında qalan Xerson vilayətinin Korabelnı rayonu da atəşə tutulub. Vilayətin mərkəzi Xerson şəhərində yaralanan 9 nəfər daşqınla əlaqədar vətəndaşların təxliyəsinə cəlb edilən xilasedicilər olub. Bundan başqa, Ukraynanın Uman şəhəri raket atəşinə tutulub. Nəticədə 8 nəfər yaralanıb. Məlumata görə, yaralananlardan 2-nin vəziyəti ağırdır. Raket zərbələri sənaye obyekti və avtoyuma məntəqəsinə endirilib. Yanğın baş verib. Ukrayna Prezidenti Volodimir Zelenski axşam videomüraciətində Rusiyanı tənqid edib. O, Moskvanı su altında qalan ərazilərə atəş açmaqda günahlandırıb. Zelenski, Rusiyanın bununla bölgədə davam edən axtarış-xilasetmə işlərinin qarşısını almağa çalışdığını iddia edib. O, həmçinin Donetsk vilayətində qızğın döyüşlərin getdiyini və hərbi komandanlıqla daim əlaqədə olduğunu bildirib. Dövlət başçısı bəzi uğurların olduğunu açıqlayıb. Bildirilib ki, son sutka ərzində Ukrayna ordusunun üçüncü hücum briqadası Baxmut istiqamətində 2 kvadrat kilometrdən çox ərazini işğalçılardan azad edib. Hücum nəticəsində Rusiyanın azı 30 hərbçisi həlak olub, 40 nəfər yaralanıb. Həmçinin, Rusiya qoşunlarının döyüş sursatı, texnikası, tankları və artilleriya anbarları da məhv edilib.