"Qalatasaray" Bundesliqadan futbolçu ilə güclənir

"Qalatasaray"ın transferdə üstünlük verdiyi mövqelərdən biri də sol cinah müdafiəçisidir. Bu səbəbdən rəhbərlik heyətə yeni transfer edərək problemi həll etməyi hədəfləyir.

"Operativ Media" xəbər verir ki, "sarı-qırmızılılar"ın sol cinah müdafiəçisi alternativləri arasında "Leyptsiq"in ispan futbolçusu Ancelino ön plana çıxıb.

Futbolçu keçən yay "Hofenhaym"a icarəyə verilmişdi. İspan futbolçu müqaviləsi başa çatdıqdan sonra "Leyptsiq"ə qayıdıb. 26 yaşlı futbolçunun "Qalatasaray"da oynamaq həvəsində olduğu öyrənilib.

Ancelinoda istənilən nəticə alınmazsa, alternativ adlar da müəyyən edilib. Nuno Tavares və Aleks Sandro geniş siyahının ön sıralarındadır. "Marsel"də mövsümü icarə əsasında başa vuran Tavares yenidən "Arsenal"a qayıdır. 23 yaşlı futbolçunun ingilis komandası ilə müqaviləsi 2025-ci ildə başa çatır. Aleks Sandronun "Yuventus"la müqaviləsi  bu yay başa çatır. Lakin İtaliya komandası 1 illik uzatma variantından istifadə edib. Hər iki futbolçu ilə bağlı ilkin danışıqlar aparılıb.

Ancelinonun "Leyptsiq"lə müqaviləsi 2025-ci ilin iyununda başa çatacaq. Bu mövsüm Bundesliqada ümumilikdə 35 matça çıxan təcrübəli futbolçu 1 qol vurub, 12 məhsuldar ötürmə edib.

Transfermarkt məlumatlarına görə ispan oyunçunun hazırkı bazar dəyəri 14 milyon avrodur. Karyerasında əvvəllər PSV və “Mançester Siti” kimi komandalarda çıxış edən Ancelino üçün indiyədək 42 milyon avro ödənilib. "Leyptsiq" ispan ulduzu 2021-ci ildə 18 milyon avroya "Mançester Siti"dən alıb.