Ölkədə dərman vasitələri ilə bağlı problemlərin əsas səbəbi daxili istehsalın olmamasıdır - Əhliman Əmiraslanov

"Bu gün həkim və dərman satışı ilə məşğul olan şirkətlərin əməkdaşlığı var".

"Operativ Media" xəbər verir ki, bunu Milli Məclisin Səhiyyə komitəsinin bu gün keçirilən iclasında komitə sədri Əhliman Əmiraslanov deyib.

Komitə sədri bildirib ki, bu gün ölkədə dərman vasitələri ilə bağlı problemlərin əsas səbəbi daxili istehsalın olmamasıdır: “Ölkəyə dərmanların böyük əksəriyyətinin xaricdən gətirilməsidir. Şübhəsiz ki, bu da keyfiyət və qiymətə ciddi təsir edir. Məndə olan məlumata görə, Ələt Azad İqtisadi Zonasında 4 dərman fabrikinin istehsalına icazə verilib, birinin isə inşasına başlanılıb. Dərman istehsalı hər birimizi narahat edən məsələlərin həllinə kömək edəcək”. Ə.Əmiraslanov vurğulayıb ki, xəstə istədiyi dərmanı yox, həkimin təyin etdiyi dərmanı qəbul etməlidir: “Kimsə kefi istəyəndə adı və ya qabı xoşuna gələn dərmanı alıb içməməlidir. Həkimlər tərəfindən də bu sahədə sui-istifadə halları var. Elektron resept məsələsi boşuna gündəmə gəlməyib. Bu gün həkim və dərman satışı ilə məşğul olan şirkətlər arasında sövdələşmələr olur. Hər addımda bunun şahidi oluruq. Bəzən lazım olmayan dərmanlar xəstələrə yazılır. Elektron resept bütün bunların qarşısını alacaq. Həkim resept yazanda biləcək ki, mütəxəssis nəzarət edəcək. Əvvəl resept yazılanda həkim deyirdi ki, get dərmanı filan aptekdən al, bundan sonra bunu edə bilməyəcəklər”.