"Ermənilərin Tovuz döyüşlərində məqsədi Qaraqaya yüksəkliyini götürüb Bakı-Qazax magistralına nəzarət etmək idi"

"Tovuz döyüşlərində ermənilərin məqsədi "Qaraqaya" yüksəkliyini götürüb Azərbaycanın nəqliyyat və enerji-komunikasiya xəttlərinə nəzarət etmək idi".

Bunu "Operativ Media"ya açıqlamasında hərbi ekspert Ramil Məmmədli deyib.

Eskpert bildirib ki, döyüşlərin elə ilk günlərində ermənilərin niyyəti bəlli idi:

"Tovuz Azərbaycanın strateji rayonlarından biridir. Belə ki, vacib nəqliyyat yolları, həmçinin əsas enerji xəttləri məhz bu ərazidən keçir.

Ermənilər iyul ayının 12-də Azərbaycan üçün çox strateji əhəmiyyətli bölgə olan Tovuzu hədəf seçdilər. Ermənilər Azərbaycan ərazisində olan Qaraqaya yüksəkliyini götürmək istəyirdi. Xatırladım ki, bu yüksəklik Bakı-Qazax magistralının Tovuzdan keçən hissəsini tam müşahidə etməyə imkan verirdi. Bununla yanaşı Bakı-Tblisi-Ceyhan neft kəmərinin Tovuzdan keçən hissəsi də Qaraqayadan vizual müşahidə məsafəsindədir. Həm kommunikasiya baxımından, həm də enerji baxımından əhəmiyyət kəsb edirdi".

Ramil Məmmədlinin sözlərinə görə, ermənilərin hədəfləri tək "Qaraqaya" ilə bitməyəcəkdi. Onlar yeni ərazilər götürmək niyyətində idi:

"Düşmən bütün bunların fərqində və yeni ərazilərin işğalı iddiasında olduğu idi. Buna görə də, Tovuz istiqamətində hücumlar boşu-boşuna seçilməmişdi. Təbii ki, Azərbaycan buna icazə verməzdi və tariximizə düşən Tovuz döyüşləri də qələbə ilə yekunlaşdı. Bu döyüşlər elə onların məğlubiyyətinə təkan verdi. Çünki Tovuz döyüşləri Vətən müharibəsinə, İkinci Qarabağ müharibəsinə gedən yolun əsas mərhələlərindən biri oldu".