İqor Bişçan: "Mahir Emreli komandaya faydalı olmaq üçün lazımi keyfiyyətlərə sahib olduğunu göstərdi"

"Dinamo” Zaqrebin baş məşqçisi İqor Bişçan Xorvatiya çempionatının 2-ci turunda səfərdə “İstra”ya 3:0 hesabı ilə qalib gəldikləri oyunu şərh edib.

"Operativ Media" xəbər verir ki, 45 yaşlı mütəxəssis matçdan sonrakı mətbuat konfransında bunları deyib:

"Start heyətimizdə bir neçə yeni futbolçumuz yer aldı. Buna görə də mənə necə çıxış edəcəyimiz maraqlı idi. Hər şey fenomenal alındı. Çox razı qaldım. Bu yay komandaya qoşulan Takuro Kaneko, Maksim Bernauer və Boqdan Mixayliçenko yaxşı oyun nümayiş etdirdilər.

Uzun fasilədən sonra əsas heyətdə yer alan və xeyli meydanda qalan Mahir Emrelinin nəticəyə ciddi töhfəsi oldu. O, komandaya faydalı olmaq üçün lazımi keyfiyyətlərə sahib olduğunu göstərdi. Bu matçda həqiqətən xeyli pozitiv məqam və keyfiyyət gördük"

Qeyd edək ki, Mahir Emreli “İstra” ilə oyunda 1 qol vurub və 1 məhsuldar ötürmə ilə yadda qalıb.