İcma: "Aİ bu gedişlə Ermənistan-Azərbaycan münasibətlərinin normallaşdırılması prosesindən kənarda qalacaq"

Qərbi Azərbaycan İcması son günlər Avropa İttifaqının,xüsusən onun ali nümayəndəsi Cozef Borelin (İspaniya) və Almaniyanın anti-Azərbaycan açıqlamaları ilə bağlı bildirir ki, bu gedişlə Avropa İttifaqı özünü Fransanın vəziyyətinə salaraq, Ermənistan-Azərbaycan münasibətlərinin normallaşdırılması prosesindən tam kənarda qalacaq.

"Operativ Media" xəbər verir ki, bu barədə İcmanın yaydığı açıqlamada bildirilib.

Qeyd olunub ki, xüsusən Cozef Borelin istifadə etdiyi ifadələr və tonu tamamilə qəbuledilməzdir. Son vaxtlar İspaniyanın Azərbaycana qarşı artan bəyanatları xüsusunda İspaniyanın C.Borelə, yoxsa C.Borelin İspaniyaya təlimat verməsi məsələsi sual doğurur.

Almaniya Xarici İşlər Nazirliyinin tvitter səhifəsində alman nazirin BMT Təhlükəsizlik Şurasında ingilis dilində etdiyi çıxışdan yerləşdirilmiş hissədə “Laçın” sözünün ingilis deyil, fransız dilində yazılması isə Almaniyanın acınacaqlı durumunu, özünün mövqeyinin olmadığını, məsələyə sırf rəsmi Parisin prizmasından yanaşdığını bir daha aydın göstərir.