KTMT-də iştirakçı ölkələrin hərbi personalının birgə hazırlığı müzakirə edilib

Kollektiv Təhlükəsizlik Müqaviləsi Təşkilatına (KTMT) üzv ölkələrin nümayəndələri hərbi kadrların birgə hazırlığının təkmilləşdirilməsini müzakirə ediblər. 

"Operativ Media" xəbər verir ki, bunu TASS-a KTMT-nin Birgə Qərargahının mətbuat katibi Vladislav Şeqrikoviç deyib.

O qeyd edib ki, oktyabrın 4-dən oktyabrın 6-dək Belarusda KTMT-nin Müdafiə Nazirliklərinin Rəhbərləri Şurası yanında hərbi kadrların birgə hazırlanması və elmi işlərin əlaqələndirilməsi üzrə işçi qrupun iclası keçirilib.

"Mütəxəssislər KTMT sistemində hərbi kadrların birgə hazırlanması və elmi işlərin cari məsələlərini müzakirə edə, qarşılıqlı əlaqənin artırılması məsələləri üzrə təkliflər hazırlaya və KTMT-yə üzv dövlətlərin hərbi kadrlarının birgə hazırlanması sisteminin daha da təkmilləşdirilməsi yollarını müəyyən edə bildilər", - Şeqrikoviç qeyd edib.

O əlavə edib ki, tədbirdə KTMT-yə üzv ölkələrin müdafiə nazirliklərinin hərbi təhsil idarəetmə orqanlarının rəhbərləri, assosiasiyaya üzv dövlətlərin tədris, metodiki və elmi-tədqiqat təşkilatlarının nümayəndələri iştirak ediblər.