Məktəblərdə ingilis dili dərsləri keçirilir, şagirdlər niyə ingilis dilində danışa bilmirlər?

"Xarici dil müəllimlərinin 90%-i tədris etdikləri dildə danışa bilmirlər"- bunu "Operativ Media" ya açıqlamasında təhsil eksperti Elşən Qafarov bildirib.

Ekspertin sözlərinə görə, Azərbaycanda ümumtəhsil məktəblərində nəinki şagirdlər, müəllimlərin əksəriyyəti də xarici dili ünsiyyət quracaq səviyyədə bilmirlər.

"Məsələ doğrudan da çox ciddidir. Təhsil haqqında Azərbaycan respublikasının qanunun 19-cu maddəsində, istər ümumtəhsil haqqında qanunun 13-cü maddəsində, istər ümumtəhsil məktəbinin nümunəvi nizamnaməsində ümumtəhsli məktəbinin səviyyələr üzrə məqsədini izah edərkən bildirilir ki, tam orta təhsil səviyyəsini bitirən məzunlar bir və ya bir neçə xarici dildə ünsiyyət saxlamağı bacarmalıdırlar. Ölkəmizdə ibtidai sinif müəllimlərindən sonra say etibarı ilə ən çox xarici dil müəllimləridir. Amma bizdə xarici dil müəllimlərinin 90%-i tədris etdikləri dildə danışa bilmirlər"

Ekspert deyir ki, ali təhsil müəssisələrində də vəziyyət eynidir.

"Eyni zamanda bu sahədə kadr hazırlayan istər Pedoqoji universitet, istər Xarici Dillər Universitetinin məzunları hansı ki, gələcəkdə bu sahə üzrə tədris deyəcəklər, onların böyük əksəriyyəti belə təhsil aldıqları, məzun olduqları vaxt belə dili bilmirlər. Tədris edəcəyi dildə danışa bilmirlər.

O baxımdan düşünürəm ki növbəti il xarici dil müəllimlərinin dissertasiyası gözlənilir, müəyyən tədbirlər görməlidir. Məsələn xarici dil müəllimlərinin müsahibəsini məhz tədris etdiyi dildə keçirmək lazımdır. Tədris etdiyi dildə danışa bilməyən müəllimlər sertifikasiyadan kəsilməlidir. Eyni zamanda müəllimlərin işə qəbulunda şərt qoyulmalıdır. Heç olmasa 1 xarici dil üzrə beynəlxalq sertifikatı olmalıdır. Yalnız bu yolla problemi həll etmək olar"