Bütün kəndi mühasirəyə almışdılar, qarşılarına kim çıxırdısa, qətlə yetirirdilər - Zərərçəkmiş

Xaçatryan bizim kəndin bütün yollarını yaxşı tanıyırdı. Bütün kəndimizi mühasirəyə almışdılar, qarşılarına kim çıxırdısa, qətlə yetirirdilər.

"Operativ Media" nın məlumatına görə, bunu qanunsuz erməni silahlı birləşmələrinin tərkibində Xocalı rayonunun Meşəli kəndində soyqırımı törətməkdə təqsirləndirilən Xaçatryan Vaqif Çerkezoviçin cinayət işi üzrə məhkəmənin iclasında zərərçəkmiş, Meşəli kənd sakini Əli Behbudov deyib.

O qeyd edib ki, bütün bu cinayətlərin başında duranların biri Xaçatryan idi.

“Ermənilər bizə zülüm veriblər, Xaçatryan da birbaşa iştirak edirdi. Xahiş edirəm, bu adama ömürlük həbs cəzası verilsin”, - deyə o əlavə edib.

Qeyd edək ki, Meşəli soyqırımı ilə bağlı beynəlxalq axtarışda olan Ermənistan vətəndaşı Xaçatryan Vaqif Çerkezoviç bu ilin iyulunda Laçın sərhəd-keçid məntəqəsində saxlanılıb. Onun üzv olduğu cinayətkar dəstə dekabr ayında Xocalı rayonunun Meşəli kəndində 25 nəfər azərbaycanlını öldürüb, 14 nəfərə xəsarət yetirib, 358 nəfər azərbaycanlını isə qanuni yaşadıqları yerdən didərgin salıblar.

Ona qarşı Cinayət Məcəlləsinin 103-cü (Soyqırımı-hər hansı milli, etnik, irqi və ya dini qrupu, bir qrup kimi bütövlükdə və ya qismən məhv etmək məqsədilə qrup üzvlərini öldürmə, qrup üzvlərinin sağlamlığına ağır zərər vurma və ya onların əqli qabiliyyətinə ciddi zərər vurma) və 107-ci (Əhalini deportasiya etmə və ya məcburi köçürmə-əhalini qanuni yerləşdiyi yerlərdən başqa ölkəyə qovma və ya digər məcburi hərəkətlərlə didərgin salma) maddələri ilə ittiham elan olunub, barəsində həbs qətimkan tədbiri seçilib.

Cinayət işi üzrə 59 nəfər zərərçəkmiş qismində tanınıb.