Elşad Hacıyev: "Zəlzələ baş verəndən dərhal sonra Bakı və digər ərazilər üzrə polis gücləndirilmiş iş rejiminə keçib"

Daxili İşlər Nazirliyinin (DİN) Mətbuat xidmətinin rəisi Elşad Hacıyev bildirib ki, zəlzələ ilə bağlı indiyə qədər növbətçi hissələrdə dağıntı, yaxud xoşagəlməz hal qeydə alınmayıb.

"Operativ Media" xəbər verir ki, o, bunu Respublika Seysmoloji Xidmət Mərkəzində bugünkü zəlzələ ilə bağlı keçirilən brifinqdə deyib.

"Zəlzələ baş verəndən dərhal sonra Bakı və digər ərazilər üzrə polis gücləndirilmiş iş rejiminə keçib. Panikaya düşməyə ehtiyac yoxdur. Yol polisi, post patrul xidməti və digər əməkdaşlar öz sahələrində aidiyyəti üzrə cəlb olunub. İndiyə qədər olan vəziyyətə görə növbətçi hissələrdə dağıntı, yaxud xoşagəlməz hal qeydə alınmayıb. Metro, ali təhsil müəssisələri, məktəb və uşaq bağçaları nəzarətə götürülüb. Polis əməkdaşları bütün lazımi işləri görür. Vətəndaşlara tövsiyə edirik ki, heç bir panikaya düşməsinlər", - o qeyd edib.