“Vətəndaşların seçki hüququnun təmini” mövzusunda növbəti dəyirmi masa keçirildi

Azərbaycan Respublikasının İnsan Hüquqları üzrə Müvəkkili (Ombudsman) Aparatının və Mərkəzi Seçki Komissiyasının (MSK) birgə əməkdaşlığı çərçivəsində prezident seçkiləri ilə əlaqədar “Vətəndaşların seçki hüququnun təmini” mövzusunda növbəti dəyirmi masa Şəki şəhərində keçirilib.

“Operativ Media” xəbər verir ki, tədbirdə çıxış edən Ombudsman Aparatının rəhbəri Aydın Səfixanlı seçkiyə hazırlıq məqsədilə maarifləndirmə tədbirlərinin paytaxt və regionları əhatə etdiyini bildirib. O, seçki prosesinin həyata keçirilməsi zamanı aşkarlıq və ədalət prinsiplərinə əsaslanan müşahidəçilik institutunun əhəmiyyəti barədə tədbir iştirakçılarına məlumat verib.

Bu institutun seçki prosesi zamanı yarana biləcək çatışmazlıqların aradan qaldırılmasındakı rolunun əhəmiyyətinə toxunub. Bundan başqa, sağlamlıq imkanları məhdud şəxslərin seçki hüququnun təmini məsələsinin zəruriliyi də diqqətə çatdırılıb.

MSK-nın əməkdaşı Samir Tağıyev Prezident seçkilərinə hazırlıq məqsədilə Komissiya tərəfindən görülən işlər, həyata keçirilən və nəzərdə tutulan tədbirlər barədə məlumat verib. Mərkəzi Seçki Komissiyasının üzvü Nizami Nadirxanlı müşahidəçilik institutunun əhəmiyyətinin seçki hüququnun daha səmərəli təmininə xidmət etdiyini vurğulayıb.

Müzakirələr zamanı iştirakçıları maraqlandıran suallar cavablandırılıb.