TƏBİB təcili yardım avtomobillərinə yeni qadağalar qoyub?

Son günlər sosial şəbəkələrdə təcili tibbi yardım maşınında körpəsini xəstəxanaya aparan vətəndaş və sürücü arasındakı dialoq müzakirələrə səbəb olub.

"Operativ Media" xəbər verir ki, yayılan videogörüntüdən aydın olur ki, körpə övladının qan itirdiyini iddia edən valideyin sürücüdən səs siqnallarından istifadə etməsini tələb edib. Tıxacda qalan sürücü isə müdiriyyətin buna icazə vermədiyini bildirib.

TƏBİB-in şöbə müdiri Zamirə Adilova ARB-nin efirində bildirib ki, TƏBİB-in səs siqnallarını işə salmaqla bağlı belə bir qadağası yoxdur:

"Yol hərəkəti haqqında Azərbaycan Respublikasının qanunun tələbinə görə təcili tibbi yardım avtomobilləri operativ üstün keçid hüququna malikdir. Bu da o deməkdir ki, sanitar avtomobillər digər yol iştirakçıları üçün təhlükəli vəziyyət yaratmamaq şərti ilə xüsusi tapşırıqları yerinə yetirərkən sayrışan işıq və səs sinqallarından istifadə edə bilər".

O, qeyd edib ki, səs siqnalları və sayrışan işıqlardan yalnız təyinatı üzrə istifadə olunmalıdır. 

Zamirə Adilova bildirib ki, TƏBİB tərəfindən yuxarıda qeyd olunan görüntülər araşdırılıb:

"Aprelin 20-də azyaşlının yıxılması ilə bağlı TƏBİB-ə müraciət daxil olub. Çağırış ünvanına qısa müddətdə təcili yardım birqadaları cəlb olunub. Pasiyent Sabunçu Tibb Mərkəzinə aparılıb. Azyaşlıya dizin ön hissəsinin üçdə birinin kəsilmiş yarası diaqnozu qoyulub. Pasiyentə müəyyən ilkin tibbi yardım göstərildikdən sonra əlavə cərrah müayinəsi üçün digər tibb müəssisəsinə təxliyyə olunub. Ehtimal olunur ki, həmin videogörüntülər təxliyyə zamanı çəkilib. Bu da o deməkdir ki, artıq pasiyentə həmin ana qədər ilkin zəruri tibbi xidmət göstərilib. Yəni onun həyatı üçün xüsusi risk daşıyan hal mövcud olmayıb".

"Buna baxmayaraq etik normativ qaydaları pozduğuna və yanlış informasiya verdiyinə görə sürücüyə inzibati cəza tətbiq ediləcək", - o, qeyd edib.