Rusiya kosmosda silahlanma yarışının dayandırılmasına veto qoyub

Rusiya BMT Təhlükəsizlik Şurasında bütün ölkələri kosmosda silahlanma yarışının qarşısını almağa çağıran qətnaməyə veto qoyub.

"Operativ Media" xəbər verir ki, Birləşmiş Ştatlar Rusiyanın kosmosa əsaslanan, peyk əleyhinə nüvə silahları hazırladığına dair xəbərdarlıq edib. 

ABŞ və Yaponiya tərəfindən irəli sürülən qətnamə layihəsi 1967-ci il Kosmos Müqaviləsində artıq təsbit edilmiş prinsipi bir daha təsdiq etməyə çalışıb.

Rusiya hazırkı razılaşmaya “tamamilə sadiq olduğunu” bildirib.

Çərşənbə günü təqdim edilən layihə bütün dövlətləri, xüsusən də böyük kosmik imkanlara malik olanları kosmosdan dinc məqsədlərlə istifadə və kosmosda silahlanma yarışının qarşısının alınması məqsədinə fəal töhfə verməyə çağırır.

O, həmçinin ölkələri Kosmos Müqaviləsini dəstəkləməyə çağırıb, bu müqaviləyə əsasən, bütün tərəflər Yer kürəsinin orbitinə nüvə silahı və ya digər kütləvi qırğın silahları daşıyan hər hansı obyekt yerləşdirməmək barədə razılığa gəliblər.

Şuranın 15 üzvündən 13-ü lehinə, veto hüququna malik 5 daimi üzvdən biri olan Rusiya əleyhinə, Çin isə bitərəf qalıb.