Ukraynada Xarkov uğursuzluğa görə 28 komandirə qarşı cinayət işi açılıb

Dövlət Təhqiqatlar Bürosu (DBB) Xarkov istiqamətində müdafiədə uğursuzluqla əlaqədar Ukrayna Silahlı Qüvvələrinin (AFU) 28 bölmə komandirinə qarşı cinayət işi açıb.

"Operativ Media" xəbər verir ki, bu barədə "Qlavkom" nəşri məhkəmə reyestrinə istinadən məlumat yayıb.

Nəşrin istinad etdiyi ibtidai istintaqa əsasən, Xarkov vilayətinin bəzi yaşayış məntəqələrində "Xortitsa" qoşun qruplaşmasının Xarkov əməliyyat-taktiki qrupunun məsuliyyət zonasına daxil olan hərbi qulluqçular öz hərbi hissələrini tərk ediblər. 

İstintaq hesab edir ki, Ukrayna Silahlı Qüvvələrinin 125-ci briqadasının komandanlığı və onların tabeliyində olanlar Rusiya-Ukrayna sərhədində müdafiəni düzgün təşkil etməyiblər. Bu səbəbdən Ukrayna ordusu mövqelərini, hərbi texnikasını və şəxsi heyətinin bir hissəsini itirib. Məlumata görə, əməliyyat-taktiki qrupun komandiri, briqada, batalyon və rota komandirləri, habelə qərargahın kəşfiyyat şöbəsinin rəisi yoxlanılır. 

Nəşr qeyd edir ki, istintaq çərçivəsində hərbi ekspertiza təyin edilib, hərbi xidmətdə səhlənkarlıq və döyüş meydanını icazəsiz tərk etmə maddələri ilə cinayət işi açılıb. Bu maddələrlə mühakimə olunanlar üçün maksimum cəza 10 ildir.