Gürcü xalqı bir müddət əvvəl keçirilmiş seçkilərdə öz demokratik iradəsini nümayiş etdirdi - ŞƏRH
"Gürcü xalqı bir müddət əvvəl keçirilmiş seçkilərdə öz demokratik iradəsini nümayiş etdirdi. Onların seçimi “Gürcü Arzusu” partiyası oldu və bu partiya seçkilərdə qalib gəldi. Lakin Avropa İttifaqı və bir sıra Qərb dövlətlərinin Gürcüstanı ikinci Ukraynaya çevirmə planları nəticəsiz qaldı. İndi isə həmin qüvvələr seçkiləri tanımamaqla Gürcüstanın daxili işlərinə qarışır, Gürcü xalqının iradəsinə qarşı çıxaraq, onların seçiminə açıq-aşkar müdaxilə edir və müxtəlif təxribatlara əl atırlar".
Bu fikirləri "Operativ Media"ya politoloq Fikrət Əliyev bildirib.
O, qeyd edib ki, bu prosesin ən bariz nümunəsi kimi ABŞ-ın Gürcüstanla strateji tərəfdaşlığı dayandırdığını elan etməsi göstərilə bilər:
"Bu qərarın əsası olaraq seçkilərin yenidən keçirilməsi tələbi irəli sürülür. Sual yaranır: Görəsən, ABŞ administrasiyasının maliyyələşdirdiyi və təsir altında saxladığı siyasi partiyalar və QHT-lər seçkilərdə məğlub olduğu üçün yenidən seçkilər keçirilməlidirmi? Demokratiya məhz xalqın iradəsinə əsaslanırsa, bu tələblər demokratik dəyərlərlə nə dərəcədə uyğun gəlir?
Avropa İttifaqının da Gürcüstanın daxili işlərinə müdaxiləsi və Gürcü xalqının seçiminə qarşı çıxışı eyni dərəcədə qəbuledilməzdir. Bu cür təzyiqlər və təxribatlar nəinki regiondakı sabitliyi pozur, eyni zamanda ölkənin inkişafını ləngidir. Buna baxmayaraq, biz inanırıq ki, qonşu Gürcüstanda xalqın iradəsi üstün gələcək və tezliklə ölkədə siyasi sabitlik bərqərar olacaq. Gürcü xalqının öz gələcəyini müstəqil şəkildə müəyyən etmək hüququ toxunulmazdır".
