Almaniya KİV: "Mahir Emrelinin keyfiyyətləri ikinci Bundesliqa üçün hələ də orta səviyyədən yüksəkdir"

Almaniyada Mahir Emrelinin "Nürnberg"in "Karlsrue"yə qarşı (2:1) 18-ci tur oyunundakı çıxışı ilə bağlı fikir bildirilib.

"Operativ Media" xəbər verir ki, bu haqda Almaniya mediası məlumat yayıb.

"Bir qədər təəccüblüdür ki, Mahir Emreli "Karlsrue"yə qarşı start heyətində yer aldı. Miroslav Kloze hücumçunu təriflədi, lakin digər tərəfdən onun cərimə meydançasında oyununu təkmilləşdirmək üçün imkanların olduğunu qeyd etdi.

Mahirin ilin ilk rəsmi matçında start heyətində yer alması ilə bağlı qərar asan deyildi. Baş məşqçi Kloze bu qərarı intuisiya ilə verdiyini və bunun səbəbini sistem və rəqiblə əlaqələndirdiyini izah etdi. Hər halda, 27 yaşlı hücumçu bir neçə həftə öncəki kimi görünmür və yeddi oyundur qol vura bilməməsi ilə yanaşı, onun müdafiədəki oyunu da tənqid edilir.

Mahir Emreli "Karlsrue"yə qarşı hücumda çox da cəlbedici oyun sərgiləməsə də, Miroslav Kloze onun güclü oyun göstərdiyini söylədi. Hücumçu topa müdaxilələrdə nizam-intizamlı və çalışqan idi, buna görə də məşqçiyə onun fədakar oyunu xoş təsir bağışladı. Hərçənd, Azərbaycanlı hücumçu 1-2 epizodda bəxtsizliyə düçar oldu.

Mahir növbəti "Şalke" ilə oyunda sarı vərəqəyə görə diskvalifikasiya səbəbindən iştirak etməyəcək. Əgər bu oyunda onun yerinə düşünülən Florian Flik yaxşı performans göstərə bilsə, növbəti qarşılaşmada da ona üstünlük verilməsi mümkündür. Çünki nə Tsimasın, nə də Emrelinin iştirakı ilə hücum variantları hələlik tam şəkildə özünü doğrultmayıb. "Nürnberg" hücum xəttində alternativ axtarışlarını davam etdirir.

Lakin Mahir narahat olmamalıdır. Çünki onun keyfiyyətləri ikinci Bundesliqa üçün hələ də orta səviyyədən yüksəkdir. Qol vurmaq isə, şübhəsiz, hücumçunun vəziyyətinə fayda verəcək".