Azərbaycan millisinin qapıçısı: "Futzalçılarımızda beynəlxalq arena təcrübəsi çatışmazlığı var"

"Futzalçılarımızda beynəlxalq arena təcrübəsi çatışmazlığı var"

Bunu "Operativ Media"ya açıqlamasında futzal üzrə Azərbaycan millisinin qapıçısı Rövşən Hüseynli Yunanıstanla keçirilən oyun haqqında danışarkən deyib.

"Əslində oyuna yaxşı başlamışdıq. İlk dəqiqədə qol hesabını da açan tərəf biz olduq. Bundan sonra rəqib komanda bizə 2-3 qol epizodu da verdi, hansı ki, Yunanıstan millisi səfərdə oynayırdı. Oyunu, topun sürətini, oyun atmosferini hiss etmirdi. Biz bu 2-3 epizoddan istifadə edib hesab fərqini artırmaqla daha fərqli tərzdə oyun görə bilərdik. Rəqibi bu epizodların birində cəzalandırmaqla oyundan qoparda bilərdik. Ancaq biz bu epizodlardan istifadə edə bilmədik və əksinə biz bir qədər geriyə çəkildik, topun sürətini aşağı saldıq. Bu da Yunanıstan millisinin işinə yarayırdı. Onlar oyun atmosferini hiss eləməyə başladılar. Oyunu ələ aldılar. Nəinki ələ almaq, hətta birinci hissədə üstünlük də, Yunanıstan tərəfində idi. Hansı ki, 4-5 real qol epizodu yaratmışdılar və sonda hesabı da bərabərləşdirdilər. İkinci hissəyə də fərqli tərzdə başladıq. Daha sonra 5-in 4-ə oyun üslubundan istifadə eləməyə başladıq. Bizə qələbə vacib lazım olduğundan bu üsluba keçdik. Yunanıstan millisinə həmişə qalib gəlmişik, dünənki oyunda da qalib gələ bilərdik"

O, qalib gələ bilməməklərinin səbəbini təcrübə çatışmazlığında görüb.

"Sadəcə bir amil var ki, bizim milli komanda gənclərdən və yerli futzalçılardan təşkil olunub. Futzalçılarımızda da beynəlxalq arena təcrübəsi çatışmazlığı var. Ancaq pozitiv baxmaq lazımdır. Altı ildir ard-arda biz Avropa çempionatında iştirak edirik. Növbəti mərhələyə çıxmaq şansımız 50-nin 50-yədir. Bir pozitiv tərəf odur ki, milli komandamız yerlilərdən təşkil olunub. Sadəcə dəstək olmaqla belə oyunlarda təcrübə yığmaqla qarşıdakı oyunlarda ümid edirəm ki, yaxşı nəticə əldə edərik".

Qeyd edək ki, futzal üzrə Azərbaycan millisi AVRO-2026-nın əsas mərhələsi çərçivəsində Bakıda Yunanıstan millisi ilə 2-2 hesablı heç-heçə edib.