Bakıda keçirilən hər bir beynəlxalq tədbir Azərbaycanın xarici aləmdə nüfuzunu möhkəmləndirmək baxımından böyük əhəmiyyət daşıyır - DEPUTAT

"Bakıda keçirilən hər bir beynəlxalq tədbir Azərbaycanın xarici aləmdə nüfuzunu möhkəmləndirmək baxımından böyük əhəmiyyət daşıyır. XII Qlobal Bakı Forumuna 400-dən çox nümayəndənin qatılması ölkəmizə olan marağın və etimadın göstəricisidir. Hər bir iştirakçı burada təkcə rəsmi çıxışlardan deyil, həm də qarşılıqlı görüşlərdən, mədəni tanışlıqlardan və şəxsi müşahidələrdən öz nəticələrini çıxarır. Bu proses Azərbaycanın beynəlxalq arenada tanıdılmasına, onun mədəni irsinin, qonaqpərvərliyinin və vətənpərvər xalqının daha yaxından tanınmasına xidmət edir". 

Bu sözləri Milli Məclisin deputatı, filologiya üzrə fəlsəfə doktoru Tahir Rzayev Operativ Media-ya deyib.  

O bildirib ki, Azərbaycan xalqının qonaqpərvərliyi və nümunəvi ev sahibi kimi çıxış etməsi bütün dünyada alqışlanır: "Ölkəmizə gələn qonaqlarda xoş təəssürat yaradan bu xüsusiyyət Azərbaycanı beynəlxalq tədbirlərin keçirilməsi üçün əlverişli məkana çevirir. Belə tədbirlərin Bakıda tez-tez təşkil olunması təkcə Azərbaycanın beynəlxalq əlaqələrinin möhkəmlənməsinə deyil, eyni zamanda ölkəmizin qlobal məsələlərin müzakirəsinə verdiyi töhfəni də nümayiş etdirir.

Bu cür tədbirlərin hər birinin öz məqsəd və məqamı var. Onlar dünyada sülhün və əmin-amanlığın bərqərar olunmasına, insanlar arasında münasibətlərin yaxşılaşmasına, ekoloji problemlərin həllinə və cəmiyyətin düşündüyü digər vacib məsələlərin müzakirəsinə öz töhfəsini verir. Qlobal forumun Bakıda keçirilməsi məhz bu baxımdan əhəmiyyətli addımdır və öz müsbət nəticələrini göstərməyə davam edəcək".