Aprel döyüşləri Vətən müharibəsindəki qələbəyə aparan yolun başlanğıcıdır - ŞƏRH

"Azərbaycan Ordusunun Aprel döyüşlərindəki qələbəsindən 9 il ötür. Azərbaycan müstəqilliyini bərpa etdikdən sonra hərb tarixində xüsusi önəm kəsb edən döyüşlərdən biri məhz Aprel döyüşləridir. Qarabağın 2020-ci ildə azad olunmasında Aprel döyüşləri mühüm rol oynayıb".

Bu sözləri Operativ Media-ya Milli Məclisin deputatı Ceyhun Məmmədov deyib.

Deputat bildirib ki, bu döyüşlərdə Azərbaycan əsgərləri böyük qəhrəmanlıq və igidlik nümunəsi göstərdilər: "Xüsusi əhəmiyyətə malik strateji mövqe olan Lələtəpə yüksəkliyi düşmənin bütün müqavimət cəhdlərinə baxmayaraq Azərbaycan Ordusu tərəfindən tamamilə azad edildi. 

Bu döyüşlər Azərbaycan müstəqillik tarixində yeni bir mərhələnin başlanğıcı oldu və xalqımızda böyük inam və ümid yaratdı.

Azərbaycan Ordusunun gücünü və döyüş qabiliyyətini dünyaya sübut edən Aprel döyüşləri bizi 2020-ci ildə qazandığımız Vətən müharibəsindəki qələbəyə aparan yolun başlanğıcı oldu. 2016-cı il aprelin 2-dən 5-dək davam edən bu döyüşlərin ən önəmli nəticələrindən biri Lələtəpə yüksəkliyinin azad olunması idi. Bu hadisə Azərbaycan hərb tarixində dönüş nöqtəsi oldu. Çünki həmin dövrə qədər Azərbaycan yalnız torpaq itirmişdi Ermənistan isə işğalçılıq siyasətini davam etdirirdi.

Aprel döyüşləri "güclü Ermənistan ordusu" mifini darmadağın etdi və düşmən tərəfdə ciddi sarsıntı yaratdı. Bu döyüşlər ermənilərə Azərbaycanın haqq yolundan heç vaxt geri çəkilməyəcəyini anladan tarixi hadisələrdən biri oldu. Xalqımız bu döyüşləri heç vaxt unutmayacaq və qəhrəman şəhidlərimizi hər zaman ehtiramla yad edəcək.

Bütün şəhidlərimizə Allahdan rəhmət diləyirik!".