Şəxsin yüksəkixtisaslı miqrant hesab olunmasının qiymətləndirilməsi qaydası təsdiqlənib

Şəxsin yüksəkixtisaslı miqrant hesab olunmasının qiymətləndirilməsi qaydası və meyarları təsdiqlənib.

Operativ Media xəbər verir ki, bu barədə Baş nazir Əli Əsədov qərar imzalayıb.

Əcnəbilərin müraciətlərinin qəbulu və cavablandırılması bu məqsədlə yaradılan və “bir pəncərə” prinsipi əsasında fəaliyyət göstərən “Yüksəkixtisaslı miqrant” portalı vasitəsilə təmin ediləcək.

Əcnəbilərin portala daxil etdikləri müraciətlərinə Dövlət Miqrasiya Xidmətinin vahid miqrasiya məlumat sistemində yaradılan “Yüksəkixtisaslı miqrantlar” altsistemi vasitəsilə baxılacaq.

Qiymətləndirilmə meyarları üzrə dövlət orqanları bal təyin edəcək və yekunda bütün ballar cəmlənəcək.

Verilmiş balların cəmi azı 70 bal olduqda əcnəbi yüksəkixtisaslı miqrant hesab olunması üçün nəzərdə tutulan keçid balını toplamış hesab olunacaq.

Şəxsin yüksəkixtisaslı miqrant hesab olunması elektron sənədlə rəsmiləşdirilir və elektron sənəd 5 il müddətinə veriləcək.