Çin, Kahramanmaraşın Pazarcık rayonunda baş verən və 10 vilayətdə dağıntılara səbəb olan zəlzələdən zərər çəkənlərə kömək məqsədilə Türkiyəyə 6 milyon dollarlıq təcili yardım təklif edib.

"Operativ Media" xəbər verir ki, Çin Beynəlxalq İnkişaf Əməkdaşlıq Agentliyi, etdiyi şərhdə, Kahramanmaraşın Pazarcık rayonunda baş verən və bir çox bölgəni təsir edən zəlzələ ilə əlaqədar başsağlığı mesajı çatdıraraq həm Türkiyə, həm də Suriya ilə təmasda olduqlarını açıqlayıb.

Agentliyin sözçüsü zəlzələdən zərər çəkənlər üçün Türkiyəyə yardım təklif etdiklərini və 40 milyon yuan (təxminən 6 milyon dollar) dəyərində ilk tranşın çatdırılacağını bildirib.

Digər tərəfdən Çin Qızıl Xaç Cəmiyyəti Türkiyə və Suriyaya 200 min dollar dəyərində təcili yardım edəcəklərini açıqlayıb.