Aqil Nəbiyev: “İnanıram ki, bu futbolçularla daha yaxşı nəticələr əldə edə bilərik”

17 yaşadək futbolçulardan ibarət Azərbaycan milli komandasının baş məşqçisi Aqil Nəbiyev Moldovanın paytaxtı Kişineuda təşkil olunan UEFA İnkişaf Turnirindəki çıxışla bağlı fikirlərini bölüşüb.

Operativ Media xəbər verir ki, baş məşqçi Estoniya ilə keçirilən son oyunu (1:2) dəyərləndirib.

“Estoniya ilə oyunda məqsədimiz qələbə qazanmaq idi. Lakin UEFA İnkişaf Turnirinin şərtlərinə əsasən heyətdəki 20 futbolçunun hər birinə minimum 90 dəqiqə oyun şansı verməliydik. Buna görə də əvvəlki oyunlarda az şans qazanan futbolçular bu görüşdə meydana çıxdılar. Üstünlük bizdə olsa da, fərdi səhvlərdən iki qol buraxdıq və yaratdığımız çoxsaylı imkanlardan istifadə edə bilmədik. Bu isə texniki və fərdi çatışmazlıqlardan qaynaqlanır. Təəssüf ki, milli komandada bu problemləri aradan qaldırmaq üçün kifayət qədər vaxtımız olmur. Burada əsas diqqət taktiki hazırlıqlara yönəlir. Futbolçular bu nöqsanları klublarında aradan qaldırmalıdırlar”.

Aqil Nəbiyev komandanın ümumi inkişafında irəliləyiş olduğunu da vurğulayıb:

“Bu, bizim ikinci toplanışımız idi və əvvəlki ilə müqayisədə böyük fərq hiss olunur. Uşaqlarda inkişaf var. Gürcüstanla oyunda komandanın potensialını göstərdik. Beynəlxalq təcrübə azlığı bəzi çətinliklər yaradır, lakin seçmə mərhələyə qədər hər şeyin yaxşılığa doğru dəyişəcəyinə inanıram”.

Qeyd edək ki, Azərbaycan U-17 millisi UEFA İnkişaf Turnirində Moldova (0:1), Gürcüstan (1:0) və Estoniya (1:2) komandaları ilə qarşılaşıb.