"İlk oyundan əvvəl bəziləri "Qarabağ"ın rahat udacağını gözləyirdi".

Bunu Operativ Media-ya Azərbaycan millisinin keçmiş futbolçusu Ruslan Əmircanov Azərbaycan kubokunun yarımfinal mərhələsinin cavab qarşılaşması çərçivəsində keçiriləcək "Qarabağ" - "Araz-Naxçıvan" oyunu haqqında danışarkən deyib.

Əmircanov cavab qarşılaşmasının olduqca çətin keçəcəyini bildirib.

“Hər iki komanda bu oyuna ciddi şəkildə köklənib. Onlar həm Azərbaycan çempionatında, həm də kubokda medallar uğrunda mübarizə aparan yeganə kollektivlərdir. Bu amillər qarşıdakı oyunun maraqlı və gərgin keçəcəyindən xəbər verir. Matçın hər anında nəsə baş verə bilər. Həm gərgin mübarizə, həm də oyunçular arasında emosional anlar gözləniləndir.”

Gənc məşqçi “Araz-Naxçıvan”ın heç də zəif komanda olmadığını vurğulayıb:

“İlk oyundan əvvəl çoxları “Qarabağ”ın asan qələbə qazanacağını düşünürdü. Lakin qarşılaşma göstərdi ki, "Araz-Naxçıvan" güclü komandadır. Elmar Baxşıyevin rəhbərlik etdiyi kollektiv bu mövsüm performansı ilə diqqət çəkir. Zədə problemləri olsa da, bir neçə əsas oyunçu heyətə qayıdıb.”

Ruslan Əmircanov sonda hər iki komandaya uğurlar arzulayıb.

Qeyd edək k, "Qarabağ" - "Araz-Naxçıvan" matçı aprelin 23-ü saat 17:00-da Tofiq Bəhramov adına Respublika stadionunda keçiriləcək.