“OBA” marketlər şəbəkəsi dünyanın tanınmış “The Consumer Goods Forum” təşkilatına üzv oldu
Veysəloğlu Şirkətlər Qrupuna daxil olan “OBA” marketlər şəbəkəsi dünyanın aparıcı istehlak malları istehsalçıları və pərakəndə satış şirkətlərini bir araya gətirən, CEO-lar tərəfindən idarəolunan qlobal təşkilat olan “The Consumer Goods Forum”a (CGF) üzv olub.
Operativ Media xəbər verir ki, 70-dən çox ölkədən üzvləri olan bu qurumun əsas məqsədi istehlak malları sənayesində müsbət dəyişikliklərə təkan vermək və birlikdə fəaliyyət göstərməyi təşviq etməkdir. Bu dəfə Niderlandın paytaxtı Amsterdamda keçirilən CGF-in iclasında “OBA” marketlər şəbəkəsinin İdarə Heyətinin sədri Natəvan İbrahimova heyəti iştirak edib.
CGF-in əsas vəzifəsi, insanlara, ətraf mühitə və biznes proseslərinə təsir edən qlobal problemləri birlikdə həll etmək üçün şirkətləri birləşdirməkdir. Təşkilatın diqqət mərkəzində qida təhlükəsizliyinin artırılması, ətraf mühitə təsirin azaldılması, sağlam həyat tərzinin təşviqi, insan hüquqlarının qorunması və təchizat zəncirinin şəffaflığının artırılması kimi sahələr dayanır.
CGF şirkətlərin ortaq hədəflər ətrafında bir araya gəlməsinə, təcrübə mübadiləsinə və davamlı inkişaf üçün sənaye standartlarının formalaşmasına şərait yaradır. Bu platforma vasitəsilə üzv şirkətlər həm bir-birilərindən öyrənir, həm də məsuliyyətli və davamlı biznes modelləri qururlar.
Qonşu market konsepsiyasını hazırki fəaliyyətində prioritetə çevirən “OBA” marketlər şəbəkəsinin CGF-ə üzvlüyü marketlər şəbəkəmizin gələcək inkişafına böyük fürsətlər yaradacağına əminik.
Qeyd edək ki, “OBA” marketlər şəbəkəsi artıq 3 ildən çoxdur ki, diskaunt market konsepsiyasından “qonşu market” modelinə keçid edib. Bununla yanaşı, tədarük zəncirinin keyfiyyətli idarəolunması üçün mərkəzi anbar sistemindən başlayaraq istehsalçılarda keyfiyyət standartlarının tətbiqinədək bir sıra mühüm və məzmunlu layihələr həyata keçirilib. Dünyanın tanınmış şirkətlərinin üzv olduğu “The Consumer Goods Forum” strateji hədəflərin daha yüksək fonda davam etdirildiyinin göstəricisidir.
Qeyd edək ki, 2016-cı ildən fəaliyyət göstərən “OBA Market” MMC hazırda 1600-dən çox marketi və 10 000-ə yaxın əməkdaşı ilə vətəndaşlara xidmət göstərir.
