Azərbaycanlı mütəxəssis Ceyhun Xəlilov Kahramanmaraşda qabaqcıl görüntüləmə cihazı ilə 14 nəfərin dağıntılar altından xilas edilməsinə kömək edib.
"Operativ Media" xəbər verir ki, bu barədə "TRT Haber" məlumat yayıb.
Belə ki, zəlzələlərdən sonra Kahramanmaraşda axtarış-xilasetmə işlərinə qatılan Ceyhun Xəlilov zəlzələ xəbərini eşidən kimi Türkiyəyə getmək üçün Bakıdakı qurumlara müraciət etdiyini bildirib.
Ceyhun Xəlilov Ukraynada Milli Müdafiə Universitetini bitirdiyini, həmçinin Türkiyədə dağıntı altı görüntüləmə sistemləri üzrə təhsil aldığını qeyd edib.
İstifadə etdiyi dağıntı altı görüntüləmə cihazının qabaqcıl xüsusiyyətlərə malik olduğunu bildirən Xəlilov, iki kamera və akustik səs yazıcıdan ibarət sistemin dağıntılar altındakı vəziyyəti göstərə biləcəyini və dağıntılar altında olanlarla qarşılıqlı əlaqə imkanı təqdim etdiyini bildirib.
