Millət vəkili: Azərbaycan ilə Çin arasında viza rejiminin ləğvi böyük turist axınına səbəb olacaq

Azərbaycan ilə Çin arasında viza rejiminin qarşılıqlı olaraq ləğvi iki ölkənin turizm əlaqələrində canlanma yaradacaq.

Operativ Media  Azərtaca istinadən xəbər verir ki, bu barədə  Milli Məclis sədrinin müavini Ziyafət Əsgərov bildirib.

Son illər Çindən Azərbaycana səfər edənlərin sayında ciddi artım müşahidə olunduğunu deyən Z. Əsgərov vurğulayıb ki, 2024-cü ildə ölkəmizə gələn çinli turistlərin sayı 2023-cü illə müqayisədə 70 faiz artıb. Bu isə çox böyük göstəricidir.

“Viza rejiminin qarşılıqlı olaraq ləğvi istər Çindən Azərbaycana, istərsə də Azərbaycandan Çinə böyük turist axınına səbəb olacaq. Amma Çin əhalisinin, o cümlədən xaricə səfər edən çinli turistlərin sayını nəzərə alsaq, deyə bilərik ki, Çindən ölkəmizə turist axını daha böyük olacaq. Bu da öz növbəsində Azərbaycan iqtisadiyyatına töhfə verəcək”, - deyən Z. Əsgərov əlavə edib ki, vizasız rejim həm də işgüzar əlaqələrin genişlənməsinə və xalqlar arasında dostluğun möhkəmlənməsinə, yəni xalq diplomatiyasına təkan verəcək.

Qeyd edək ki, Azərbaycan Prezidenti İlham Əliyevin Çinə dövlət səfəri zamanı aprelin 23-də Pekində “Azərbaycan Respublikası Hökuməti ilə Çin Xalq Respublikası Hökuməti arasında ümumvətəndaş pasportlarına malik vətəndaşların vizadan qarşılıqlı azad edilməsi haqqında Saziş” imzalanıb. Sənədin qüvvəyə minməsi üçün hər iki ölkədə zəruri olan dövlətdaxili proseduralar tamamlanıb. İyulun 16-da qüvvəyə minən Sazişə əsasən, Azərbaycan və Çinin etibarlı ümumvətəndaş pasportlarına malik vətəndaşları digər ölkə ərazisinə daxil olmaq, oranı tərk etmək və yaxın tranzit keçmək üçün hər səfər ərzində 30 gündən çox olmamaqla və hər 180 günlük dövr ərzində ümumilikdə 90 gün müddətini aşmamaqla viza tələbindən azad edilirlər.