Adil Şükürov: “Kəpəz”in daha yaxşı olması üçün bütün gücümlə çalışacağam

“Bir neçə futbolçu ilə danışıqlar gedir. Yaxın günlərdə bu məsələ həll olunacaq".

Operativ Media xəbər verir ki, bunu “Kəpəz”in baş məşqçisi Adil Şükürov klubun mətbuat xidmətinə müsahibəsində deyib.

Şükürov təxminən bir illik fasilədən sonra yenidən komandanın sükanı arxasına qayıtdığını vurğulayıb:

“Yenidən bu böyük klubda olmaq həm qürurverici, həm də məsuliyyətlidir. Yeni rəhbərliyə təşəkkür edirəm ki, mənə bu şansı verdilər. “Kəpəz”in daha yaxşı olması üçün bütün gücümlə çalışacağam. Artıq futbolçuların qidalanması təmin olunub, komanda bazada birlikdə daha çox vaxt keçirir ki, bu da kollektivin formalaşmasına səbəb olur. Gələcəkdə Akademiyanın məşq meydançalarında da işıqlandırma işləri aparılacaq”.

Baş məşqçi bildirib ki, yeni rəhbərliyin fəaliyyəti klubda ciddi dəyişikliklər yaradıb:

“Klubda hər kəs daha məsuliyyətli və nəticəyə yönəlik çalışmağa başlayıb. Struktur dəyişikliyi edilib, əsas komandaya və Akademiyaya dəstək gücləndirilib”.

Heyətin formalaşdırılması barədə danışan Şükürov qeyd edib ki, seçim prosesi məşqçilər heyəti tərəfindən aparılır:

“Gənc və yerli futbolçularla yanaşı, legionerlərlə də balansı qorumağa çalışırıq. İdarə heyətindən Erkin İbrahimov da bu işdə bizə dəstək olur. Bəzi transferlərdə gecikmələr olsa da, rəhbərliyin tapşırığını tam yerinə yetirəcəyimə inanıram”.

Transfer məsələsinə də toxunan mütəxəssis yeni oyunçuların komandaya qoşulacağını istisna etməyib:

“Bir neçə futbolçu ilə danışıqlar gedir. Yaxın günlərdə bu məsələ həll olunacaq və daha rəqabətədavamlı “Kəpəz” görəcəyik. Azarkeşlərin gözləntilərini doğruldacağımıza inanıram”.