22 fevral 2023-cü il tarixində Bakının Binəqədi rayonu, Biləcəri qəsəbəsində yerləşən 298 saylı tam orta məktəbdə Əliabbas Müznibin 140 illik yubileyinə həsr edilmiş tədbir keçirilmişdir.
"Operativ Media" xəbər verir ki, tədbirdə YAP Binəqədi rayon təşkilatının Binəqədi rayonu, Baksol yolu 89 ünvanında yerləşən “Unity Company” ərazi partiya təşkilatının sədri Fikrət Əliyev, Milli Məclisin Mədəniyyət Komitəsinin sədri, millət vəkili Qənirə Paşayeva, Bakı Şəhəri üzrə Təhsil İdarəsinin (BŞTİ) müdiri Mehriban Vəliyeva, Binəqədi Rayon İcra Hakimiyyətinin və BŞTİ-nin nümayəndələri, məktəbin direktoru, müəllim və şagirdlər iştirak ediblər.
Tədbir Dövlət Himninin səsləndirilməsi, Ulu Öndərin, Vətən şəhidlərinin və Türkiyədə zəlzələ nəticəsində həlak olanların xatirəsinin bir dəqiqəlik sükutla yad edilməsi ilə başlayıb.
Tədbirdə çıxış edən “Unity company” ərazi partiya təşkilatının sədri Fikrət Əliyev Azərbaycan ictimai-bədii fikir tarixində şair, tədqiqatçı, publisist, tərcüməçi kimi xüsusi yeri olan Əliabbas Müznibin həyat yolu barədə məlumat verib, onun ürəklərdə şeirləri ilə, səhnələrdəki mənzum əsərləri ilə yaşadığını söyləyib.
Tədbir zamanı Fikrət Əliyev və Qənirə Paşayeva tərəfindən Əliabbas Müznibin daha geniş ictimaiyyətə tanıdılması üçün yutub videosunun hazırlanması təklif edilib. Hazırlanan videonun baxışlarının artırılmasına dəstək olunacağı vəd olunub.
Eyni zamanda, Fikrət Əliyev öz çıxışı zamanı auditoriyadan kimin müəllim olmaq istədiyini soruşub. Bu zaman bir 10-cu sinif şagirdi əlini qaldırıb. Həmin şagird səhnəyə dəvət edilib. Onun abituriyent və universitet xərclərinin “Unity Company” tərəfindən qarşılanacağı bildirilib. Qeyd etmək lazımdır ki, bundan əvvəl də 297 nömrəli məktəbdə oxşar addım atılmış və iki şagirdin təhsil xərcləri Fikrət Əliyev tərəfindən qarşılanmışdır.
Tədbirin sonunda isə ənənəyə uyğun olaraq “Unity Company” və MM-in Mədəniyyət Komitəsi adından 300 kitab iştirakçılara hədiyyə edilmişdir.
