"Türkiyəli klub menecerlərinin peşəkar yanaşması o səviyyədə deyil ki, gəlib burada gənc istedad seçsinlər"

"Türkiyəli klub menecerlərinin peşəkar yanaşması o səviyyədə deyil ki, gəlib burda gənc istedad seçsinlər"

Bunu "Operativ Media"ya TFF-nin azərbaycanlı futbolçularla bağlı qərarını şərh edən futbol mütəxəssisi, "Dinamo Avto" klubunun idman direktoru və "Pelikan" futbol agentliyinin prezidenti Rəsul Şükürsoy deyib. O bu qərarın müsbət və mənfi tərəflərindən danışıb.

"Azərbaycanda 10 kluba yerli oyunçu çətinliklə çatır. Türkiyəli klub menecerlərinin peşəkar yanaşması da o səviyyədə deyil ki, gəlib burada gənc istedad seçsinlər. Onlar həmişə özünü təsdiqləmiş oyunçu axtarırlar. Mütləq milli komandanın aktiv üzvü olmalıdır və.s.

Düzdür, kağız üzərində azərbaycanlı futbolçuların inkişafı üçün faydalı qərardır. Ancaq, indiki halda Qazaxıstan, Özbəkistan futboluna daha çox faydalı olacağı görünür. Özbəklər, qazaxlar artıq ən azı Rusiyada, Belarusda, Polşada futbol oynayırlar. Türk klubları heç bu səviyyədə oynayanları belə analiz edib dəyərləndirə biləcək menecmentə sahib deyillər. Onlar indi Şomuradovu, Zaynutdinovu gətirməyə çalışacaqlar. Bu işə maksimalist yanaşırlar. 

Bizdə isə futbolun kütləviliyi yönündə yeni addımlar atılır. İdman prinsiplərinin təmin edilməsi, əlavə divizionun yaradılması kimi tədbirlər imkan verir ki, sükanı belə saxlasalar qarşıdakı 3-5 ildə hansısa ciddi səviyyəli yerli oyunçu sayı artar. Bundan sonra sözügedən imkandan yararlanmağa zəmin yarana bilər".

Qeyd edək ki, Türkiyə Futbol Federasiyası 2023/2024 mövsümü üçün legionerlərin statusu ilə bağlı əsasnamədə dəyişiklik edib. Yeni qərara əsasən Türkiyənin Super Liqadakı hər klubuna transfer olunan 1 azərbaycanlı futbolçu legioner sayılmayacaq.