Türkmənistan prezidenti Arkadağ “ağıllı şəhər”inin birinci mərhələsinin açılışını edib

Cümə axşamı Türkmənistan prezidenti Serdar Berdiməhəmmədovun iştirakı ilə yeni şəhər - Arkadağın birinci mərhələsinin açılış mərasimi keçirilib.

"Operativ Media" xəbər verir ki, bu barədə TASS məlumat yayıb.

Paytaxt Aşqabaddan 30 km aralıda yerləşən şəhərdə Türkmənistan Xalq Şurasının sədri Qurbanqulu Berdiməhəmmədovun anadan olmasının 66-cı ildönümü münasibətilə şənliklər keçirilib. O, 2019-cu ildə şəhərin tikintisi ilə bağlı işlərə başlayıb. Bu arada Şura sədri mərasimdə iştirak etməyib. Məlumata görə, o, Məkkəyə həcc ziyarətinə gedəcək ölkə nümayəndə heyətinə rəhbərlik edəcək.

Açılış mərasimində Rusiya, Avstriya, Azərbaycan, Ermənistan, Almaniya, Gürcüstan, Qətər, Qırğızıstan, Çin, Türkiyə, Özbəkistan və Yaponiya nümayəndələri iştirak ediblər. 

Arkadağ tikintisinin birinci mərhələsi çərçivəsində 336 müasir bina, o cümlədən komfortlu çoxmərtəbəli yaşayış binaları, ictimai, təhsil, tibb və mədəniyyət obyektləri, idman obyektləri və kommunal sistemlər tikilib. Yeni binalarda 43 minə yaxın insan məskunlaşacaq. 

Əvvəlki məlumatlarda tikintiyə 3,3 milyard dollar sərmayə qoyulduğu bildirilirdi. Şəhərin ikinci mərhələsinə (2023-cü ildən 2026-cı ilədək davam edəcək) bu ayın əvvəlində start verilib. Yeni layihə çərçivəsində qida, sənaye, əczaçılıq və tibbi məhsullar istehsalı üçün texniki və istehsal müəssisələrinin tikintisi planlaşdırılır.

Arkadağ "ağıllı şəhər" sistemi əsasında idarə olunacaq və o, Türkmənistanda ilk belə yaşayış məntəqəsi olacaq. Burada ekoloji cəhətdən təmiz nəqliyyat, “ağıllı dayanacaqlar” və günəş batareyalarından istifadə olunacaq. Şəhərin iki mərhələsi 1002 hektar ərazini əhatə edəcək. Burada təxminən 73 000 nəfərin məskunlaşacağı bildirilir.