Macarıstan: İsveçin NATO-ya üzvlüyünə Türkiyəni nəzərə almadan qərar verəcəyik

İsveçin NATO-ya qəbulu ilə bağlı protokolun Türkiyə parlamentinə təqdim edilməsi Macarıstanın mövqeyinə təsir etməyəcək, o, öz qərarını verəcək. 

"Operativ Media" xəbər verir ki, bunu Macarıstanın xarici işlər və xarici iqtisadi əlaqələr naziri Peter Szijjarto deyib.

Ondan Türkiyə prezidenti Rəcəb Tayyib Ərdoğanın İsveçin Şimali Atlantika Alyansına qəbul edilməsi ilə bağlı protokolu ratifikasiya üçün ölkəsinin parlamentinə təqdim etməsinə münasibət bildirməsi istənilib. Nazir isə belə cavab verib: "Bu, bizim mövqemizi dəyişmir. Macarıstan Parlamenti suveren ölkənin suveren parlamentidir, ona görə də bu məsələ ilə bağlı suveren qərar qəbul edəcək".

O xatırladıb ki, Macarıstan hökuməti çoxdan analoji sənədi ratifikasiya üçün parlamentə təqdim edib. 

Qeyd edək ki, Macarıstan və Türkiyə krallığın alyansa qoşulması ilə bağlı sənədləri hələ ratifikasiya etməmiş yeganə NATO ölkələridir. Budapeşt İsveç siyasətçilərinin qeyri-dost bəyanatları ilə bağlı Stokholma şikayət edib və Ankara ondan İsveçdəki terror təşkilatlarına qarşı daha sərt tədbirlər görməyi istəyib.

Macarıstan parlamentində bu məsələ ilə bağlı səsvermənin vaxtı hələ müəyyən edilməyib. Eyni zamanda, hökumət dəfələrlə bəyan edib ki, Macarıstan İsveçin qəbuluna dair sazişi ratifikasiya etməyən sonuncu ölkə olmayacaq.