ABŞ Qəzzada liman yaratmaq və yardım çatdırmaq üçün avadanlıq daşınmasına başlayıb

ABŞ Qəzza zolağına müvəqqəti liman açmaq və humanitar yardım çatdırmaq üçün avadanlıq daşımağa başlayıb. 

"Operativ Media" xəbər verir ki, bu barədə şənbə günü ABŞ Mərkəzi Komandanlığı (CENTCOM) məlumat yayıb.

"9 mart 2024-cü ildə ABŞ Hərbi Dəniz Qüvvələrinin gəmisi "General Frank S. Besson" Lenqli-Eustis bazasını tərk edərək Aralıq dənizinin şərqinə doğru yola çıxdı", komandanlıq "X" hesabında paylaşım edib.

Martın 7-də ABŞ prezidenti Co Bayden bəyan edib ki, Vaşinqton Fələstin anklavına dəniz yolu ilə humanitar yardım çatdırmaq üçün Qəzza zolağında müvəqqəti liman yaradır. Martın 8-də dövlət katibi Antoni Blinkenin aydınlaşdırdığı kimi, bu liman alternativ deyil, Misirin Rəfah keçid məntəqəsinə əlavə olacaq.

Yanvarda "The New York Times" öz mənbələrinə istinadən yazıb ki, Amerika, Britaniya və Avropa rəsmiləri Aşdod vasitəsilə Qəzza zolağına humanitar yardımın axmasına icazə vermək üçün İsrailə təzyiq edir. Nəşrin məlumatına görə, Blinken bu məsələni Təl-Əvivdəki danışıqlarda qaldırıb. Qərbin planına görə, mallar Kiprdən İsrailin Aşdod limanına, oradan isə Kerem Şalom keçid məntəqəsinə aparılaraq Qəzzaya çatdırılacaq.